A festa, aínda que animada, congregou menos xente que outros anos A edición deste ano, que fai o número dezaoito, celebrouse en Seoane
12 nov 2005 . Actualizado a las 06:00 h.?umerosos veciños e visitantes congregáronse onte pola mañá na localidade de Seoane para celebrar a Festa da Castaña do Courel, que chegou este ano á súa décima oitava edición e por tanto figura entre as feiras de exaltación gastronómica máis antigas do sur lucense. As condicións meteorolóxicas non se mostraron moi favorables, xa que na zona choveu de forma intermitente durante toda a xornada, nalgúns momentos con bastante intensidade. Talvez por esta razón, a afluencia de público foi algo menor que outros anos, pero pese a esta circunstancia, a animación foi considerable. Seguindo o costume dos últimos anos, os organizadores instalaron unha carpa no campo da festa de Seoane para evitar que o tempo estragase a celebración. Baixo esta carpa asáronse as castañas en tambores de ferro e ofrecéronse ao público en grandes bandexas de madeira, acompañadas de viño. Sobre a unha e media da tarde leu o pregón do festexo o director xeral de Conservación da Natureza, José Benito Reza, quen glosou os valores naturais da Serra do Courel, as súas paisaxes e a súa cultura tradicional. Entre os asistentes ao festexo destacou a presenza de numerosos políticos socialistas lucenses, como os deputados autonómicos José Tomé e Ismael Rego, o senador Luis Ángel Lago Lage e o alcalde de Triacastela, Miguel Ángel Fernández, que degustaron as castañas locais en compañía do alcalde do Courel, o tamén socialista José López Fontal. O programa festivo completouse con actuacións folclóricas, un magosto e unha verbena.