Durante días e días os medios de comunicación deron noticias do xuízo de Johnny Depp contra a súa ex muller. Era inevitable decatarse da horrible relación que os dous mantiveron. Aquela morbosa exhibición da súa vida íntima era innecesaria, porque non se trataba dun xuízo sobre abusos senón dun caso de difamación. E o xurado concluíu que os dous son difamadores, pero ela máis. Depp ten que pagar dous millóns ao seu ex e ela debe pagar quince ao actor. Tras a sentenza, Depp dixo: «Imputáronseme denuncias falsas, a través dos medios de comunicación, o que desencadeou un aluvión interminable de contidos de odio… e tivo un impacto sísmico na miña vida e a miña carreira».
Iso é certo . Os medios de comunicación converteron a presunción de inocencia nunha utopía. Só interesa o escándalo. Os xuíces tentarán elucidar a verdade, pero o público sentencia en canto salta a noticia. Iso inspira temor: unha denuncia falsa pode arruinar a vida dunha persoa inocente.
En La Voz de Galicia dous lectores comentan que se o xuízo se celebrase en España, condenarían ao home. Ou, no caso de que condenasen á muller, esta sería indultada polo Goberno por considerala vítima, primeiro dun maltratador e despois dunha sentenza machista-patriarcal. Igual que moitos homes, séntense inseguros. Pensan que a sociedade e a xustiza, no caso dunha denuncia de abusos, os considerará culpables. Senten o que as mulleres sentiron durante séculos: que era inútil denunciar, porque a sociedade e a xustiza estaban de parte dos homes. Eu creo que agora a Xustiza é imparcial. Só falta que a sociedade o sexa. E niso os medios de comunicación teñen un papel fundamental.