As noticias dos abusos sufridos por varias xogadoras de distintos clubs de fútbol en Estados Unidos volve poñer de actualidade a situación que sofren en España as quince xogadoras que pediron non ser convocadas para a selección. En América abriuse unha investigación independente e o resultado foi que seis adestradores están acusados de maltrato e mesmo de agresións sexuais ás deportistas, co consecuente despedimento e castigo. En España, a situación está a ser moi distinta. O correo enviado á Real Federación Española de Fútbol di textualmente: «Por la presente les informo que debido a los últimos acontecimientos acaecidos en la selección española y la situación generada, hechos de los cuales son ustedes conocedores, están afectando de forma importante a mi estado emocional y por lo tanto a mi salud». Aínda que non está ben redactado, deixa claro que hai uns feitos, xa coñecidos pola RFEF, que están a afectar á saúde das deportistas. Con todo, a federación, en lugar de tomar medidas para remediar eses feitos e as súas consecuencias, ou, polo menos, abrir unha investigación para aclarar por que quince deportistas arríscanse a denunciar, declarou que só poderían volver xogar coa camiseta de España «se asumen o seu erro e piden perdón». Pola súa banda, o adestrador asegurou que non vai dimitir.
Ademais das quince que enviaron correos electrónicos, consta o apoio de xogadoras destacadas como Irene Paredes, Jenni Fermoso e Alexia Putellas, e a do público, que desde as bancadas do estadio de Las Rozas pediu a dimisión de Jorge Vilda no partido contra Hungría, mesmo cando a selección ía gañando. Que máis necesita a federación para deixar de apoiar incondicionalmente ao adestrador?