O doutor Pedro Cavadas é un cirurxián valenciano de 60 anos que se dedica á cirurxía reconstrutiva e estética. Está considerado dos mellores do mundo na súa especialidade. Traballa nun hospital de Valencia e creou unha fundación que organiza en África campañas cirúrxicas para tratar gratuitamente pacientes con problemas reconstrutivos complexos, sobre todo nenos, que en ocasións son trasladados á Península para seren operados nas mellores condicións posibles.
Esta persoa, admirable en moitos sentidos, aparece nun vídeo da internet promovendo a venda dun produto máxico capaz de curar todas as enfermidades, nuns casos a artrose e noutros a diabetes. O vídeo está moi ben feito: falsificouse a voz, imitáronse os xestos, e mestúranse imaxes trucadas con outras verdadeiras de personaxes coñecidos. Aparece unha entrevista en Antena 3, pero é unha falsa Antena 3, e as imaxes de Matías Prats e Pablo Motos están manipuladas. Nese falso vídeo explícase que non se pode comprar nas farmacias españolas porque o doutor quere controlar o produto no seu propio laboratorio, pero que, para compensar ese inconveniente, se rebaixa o seu prezo, a condición de que a compra se realice inmediatamente porque quedan poucas unidades.
O doutor Cavadas acudiu á Xustiza para denunciar o uso fraudulento da súa imaxe, pero a súa denuncia foi (para min, incomprensiblemente) «inadmitida», e «con cristiá resignación» soporta que á súa consulta siga chegando xente pedíndolle «esa pomada que anuncia por televisión».
Esta estafa foi denunciada por diversos xornais e televisións desde hai máis dun ano. A pesar diso, unha amiga miña comentoume que quizais valese a pena probar esa pomada máxica do doutor Cavadas. Quizais o feito de que cada vez nos informemos máis a través de redes sociais ca de medios tradicionais poida explicalo. Pola miña banda, eu cóntollelo, coma sempre, confiando en que a alguén lle sexa de utilidade.