![Lar Gallego é unha asociación de música tradicional galega de Chile.](https://img.lavdg.com/sc/ZFpkJzxaJrIei98v1ZXAJ6TUPhg=/480x/2022/07/12/00121657639682930883214/Foto/O12L2046.jpg)
A Deputación acolleu unha recepción á agrupación Lar Gallego
13 jul 2022 . Actualizado a las 19:42 h.A agrupación de gaitas Lar Gallego, procedente de Santiago de Chile, visitou a sede da Escola Provincial de Gaitas de Ourense. Estiveron presentes no acto o vicepresidente primeiro da Deputación, Rosendo Fernández, e o director da Escola Provincial de Gaitas, Xosé Lois Foxo.
Dende a Deputación agradeceron a súa entrega coa música galega á agrupación sudamericana, así como a súa asistencia a cidade. «Imos facer unha simbiose do que se fai en Ourense e da música de Chile para enriquecernos mutuamente», indicou Rosendo Fernández, que cualificou o encontro como «o xeito de ser progresistas culturalmente». Por outra banda, Xosé Lois Foxo agradeceulle á Deputación que sigan apostando pola música tradicional. «Hoxe temos a honra de recibir a esta agrupación procedente dun dos lugares máis importantes da civilización onde se cultiva a nosa música», dixo.
Lar Gallego é unha asociación formada por emigrantes galegos en Chile. A agrupación leva 55 anos amosando a música tradicional galega por todo o mundo, principalmente polo país de Chile. Ricardo González, presidente do Lar Gallego, agradeceu a invitación a Ourense e convidou á Escola Provincial a visitar tamén o seu país.
Para rematar, acto contou cunha mostra musical de gaitas e uns pinchos para os asistentes. Pero antes de comezar o recital, Xosé Lois Foxo fíxolle entrega ao director de Lar Gallego dunha recopilación de éxitos das bandas de gaitas do mundo.