Carta dos felos de Maceda a Jácome: «Queren utilizarnos para maior gloria do alcalde»
OURENSE
Os felos, cigarróns, pantallas, peliqueiros, boteiros, etcétera, figuras dos entroidos ourensáns son tentados estes días por alcaldía de Ourense a participar o día 17 de febreiro venres de entroido, repito venres de entroido, nun acto folclórico, sí folclórico chamado desfile, un desfile de caretos, que o único que fai é dano, moito dano. Non dubidamos que a intención do concello de Ourense non é esta, pero o motivo que nos venden para convencer e garantir a participación é a súa promoción, promoción que ninguén lles pediu nin precisamos e que provoca o efecto contrario. A utilización que se fai de mestura de persoaxes desfilando carece de encanto, está descontextualizada e adultera totalmente a súa razón de ser destas figuras do entroido rural. Se queren verdadeiramente os políticos, neste caso o alcalde de Ourense, promocionar e dar a coñecer a riqueza dos entroidos da provincia que faga un chamamento a que se visite, Maceda, Laza, Verín, Xinzo, Viana, etcétera, para que se vexa a realidade destes entroidos. Pero o fin non é ese, se non utilizalos para maior gloria do alcalde, e Ourense pode ofrecer outras cousas, ten un carnaval urbano moi potente con identidade propia que non precisa comprar elementos alleos para a súa consolidación como unha das cidades de referenza nestas datas. Os entroidos teñen o seu tempo, o se lugar e a súa alma, alma que non se pode comprar nin secuestrar, porque eses persoaxes fora de contexto non din nin transmiten nada que teña que ver co entroido. Se queredes ver O felo, achegaivos ó concello de Maceda.