O autor de «Primavera. A camareira, o cuarto e o libro de poemas» levou no 2017 o premio de novela por entregas de La Voz de Galicia
21 may 2023 . Actualizado a las 05:00 h.O premio de novela curta Antón Risco 2023 xa ten gañador. O xurado reunido onte na sede da Fundación Vicente Risco, en Allariz, elixiu Primavera. A camareira, o cuarto e o libro de poemas como obra gañadora. O autor é Fran Fernández Davila (Vigo, 1974). O autor recibirá 3.000 euros polo premio, ademais de ver a novela publicada polo selo editorial Doutor Alveiros.
O xurado estivo composto por María Asunción Caneda Cabrera, María Xosé Fernández Casas, Francisco Javier Fontenla García, Luis González Tosar e César Lorenzo Gil. Actuou como secretaria sen voz e sen voto Ana Gloria Rodríguez Alonso. Salientaron o lirismo, ritmo e musicalidade da súa prosa, así como a curiosidade que suscita en quen a le. «A obra amosa unha gran sensibilidade tanto no relativo á situación social que reflicte coma cara á literatura como elemento curativo. Asemade os personaxes están ben perfilados, especialmente a protagonista», din desde o xurado.
Fernández Davila leva varios premios no seu palmarés. Recentemente gañou o certame literario Rosalía de Castro do Concello de Padrón. Con anterioridade tamén obtivo, entre outros, o certame de novela por entregas de La Voz de Galicia, no ano 2017.
A súa última novela publicada foi O bosque do duque (Galaxia, 2022).
