A peza de ficción conta a loita pola integración dos mozos inmigrantes de A Coruña
12 ago 2024 . Actualizado a las 11:54 h.A próxima edición do OUFF acollerá a estrea mundial do novo traballo do director Ángel de la Cruz. Desta volta o realizador coruñés participará no Ourense Film Festival, que se celebrará do 27 de setembro ao 6 de outubro, coa súa curtametraxe A Marola. A peza de ficción conta a loita pola integración dos mozos inmigrantes de A Coruña e no reparto da curtametraxe participan varios xogadores do Marola Fútbol Club, un equipo que conta con futbolistas inmigrantes.
Para desenvolver o proxecto Ángel de la Cruz contou co apoio da dirección xeral de Familia, Infancia e Dinamización Demográfica da Xunta de Galicia.
Segundo se sinala dende o Ourense Film Festival, A Marola é unha peza «que en apenas vinte minutos traslada mediante a ficción a historia real de moitos mozos migrantes. Na curta, que parte dunha idea de Vicente Bellón, avogado e fundador do Club de Fútbol A Marola, de A Coruña, participan moitos integrantes deste equipo, que teñen vivencias similares ás que conta a curta». Ao elenco non profesional súmanse neste novo traballo de Ángel de la Cruz actores e actrices como Estíbaliz Veiga, Xoán Pérez ou Tito Barbeito. O director coruñés volveu contar de novo con Estíbaliz Veiga, con quen xa traballara en Ourense cando fixo da cidade e doutros lugares da provincia os escenarios para rodar a súa película O home e o can.
O obxectivo da curta que será estrea mundial no OUFF 2024 pasa por «trasladar ao público as historias e vivencias de moitos inmigrantes que chegan a cidades galegas, eliminar prexuízos dende a solidariedade».
Gañador de varios Goya
Director, guionista, produtor e escritor, Ángel de la Cruz (A Coruña, 1963) é un dos creadores audiovisuais cunha maior proxección do cinema galego. Estivo vencellado, xunto a Manuel Gómez, a grandes éxitos da animación galega — El bosque animado ou El sueño de una noche de San Juan—, traballou en series para a TVG, dirixiu películas como Os mortos van á présa e participou en proxectos como o de Engurras. Conta con varios premios Goya.