Nos concertos de Nadal que a Coral De Ruada ofrece na Catedral dende hai máis de trinta anos mestúranse vilancicos da polifonía galega e universal con cantos de Nadal e panxoliñas populares fermosamente harmonizadas por músicos relacionados coa Coral. Ao longo dos anos foise introducindo tamén o acompañamento de órgano e de instrumentación popular, percusión inicialmente (triángulo, cunchas, pandeiretas e pandeiros), e máis tarde o resto (bombo, gaitas, zanfona e acordeón). Deste xeito, nos últimos anos, a Coral adoita desfilar dende o Pórtico do Paraíso cara as escaleiras do altar maior polo corredor central precedida do seu grupo instrumental que interpretaba algunha marcha procesional e o mesmo ocorre cando, rematado o concerto, realiza o mesmo traxecto pero en sentido inverso. Ademais, ultimamente, o grupo instrumental interpreta, cara á metade do concerto, algunha peza axeitada ao lugar e á celebración.
Cando rematou o concerto de Nadal do ano 2023, o deán, do José Pérez Domínguez —amigo e compañeiro na Universidade Laboral e gran amigo da Coral— achegouse a nós para felicitarnos polo concerto e desexarnos un feliz Nadal, como adoita facer tódolos anos, pero engadiu unha sorprendente suxestión: e, agora que tedes grupo de baile, por que non traedes unha parella e que baile unha muiñeira? Debo recoñecer que quedamos un tanto abraiados pola proposta pero tamén moi ilusionados por poder incorporar o baile ás nosas cantigas e ás nosas interpretacións instrumentais nas celebración do Nadal e dos Reis.
Deste xeito, o pasado 27 de decembro, De Ruada ofreceu o seu primeiro concerto de Nadal na Catedral de Ourense coa participación dunha parella de baile formada por Ismael Rodríguez Fernández e por Sara Fernández Álvarez. O sorprendido público —entre o que se atopaban varios membros do cabido da Catedral e o prelado da Orde de Malta-— premiou con cálidos e numerosos aplausos tódalas intervencións de De Ruada e, por suposto, da súa organista, Irma Fernández Alonso, e dos seus grupos instrumental, coordinado por Gonzalo Abelairas Lemos, e de baile, coordinado polo mencionado Ismael, dirixidos todos eles por Xoán Antón Vázquez Casas.
Para De Ruada foi unha enorme satisfacción esta nova achega da nosa cultura popular á celebración do Nadal e da festa de Reis. Un fito máis na relación da Coral coa Catedral ourensá. Téñase en conta que De Ruada cantou a primeira misa en galego celebrada en Ourense o 7 de xaneiro de 1968 na capela do Santo Cristo da Catedral, oficiada por don Celso Pérez Carnero, outro bo amigo e compañeiro na Universidade Laboral e gran amigo da Coral.
O 3 de xaneiro De Ruada ofreceu o tradicional concerto de Reis na igrexa parroquial de Santiago das Caldas, tamén coa colaboración da nosa organista e dos nosos grupos instrumental e de baile. Tamén neste caso a igrexa estaba chea de xente que premiou xenerosamente cada unha das pezas e agradeceu a introdución do baile dentro do concerto. Cómpre sinalar a este respecto a comprensión e xenerosa acollida dos párrocos don Francisco Pernas de Dios e don Luís Pérez González, aos que lles quedamos moi agradecidos.
Polo todo isto quero rematar estas liñas —e penso que interpreto correctamente o sentir dos meus compañeiros de De Ruada— agradecendo a atinada suxestión do deán da Catedral. Moitas grazas don José.