Obras de música, novela negra e para o público infantil protagonizaron o encontro
11 feb 2025 . Actualizado a las 05:00 h.Armando González presentou hai uns anos o seu libro «Escolma imposible (e incorrecta)», unha publicación na que se recollían as letras das corenta cancións realizadas entre 1973 e o 2019. A maior parte das mesmas, eran pezas creadas para María do Ceo. Aquela obra ía acompañada por dous cedés coas cancións.
As previsións do autor pasaban por incluír á Casa de Galicia en Madrid entre os lugares nos que facer a presentación. Aínda que aquilo non chegou a bo porto: «Meteuse polo medio a pandemia e pareceume que a decisión máis correcta era suspender o acto, e así o fixemos. Tiñamos aquela cita pendente, e como queira que con posterioridade viñeron os outros libros, pois a presentación deste 2025 converteuse nunha cita con tres publicacións», sinalaba antes do acto o autor. Xunto á escolma tamén se deron a coñecer na Casa de Galicia en Madrid os títulos «Pasos na azotea» e «Contos sen parche no ollo, nin pata de pau». O primeiro é unha triloxía de relatos de novela negra e os contos teñen como destinatario ao público infantil.
A trama de «Pasos na azotea» desenvolvese na provincia de Ourense e percorre escenarios coñecidos como o Couto Mixto, Aquis Querquennis, a Ribeira Sacra e o cemiterio de San Francisco. Máis que relatos do xénero negro o autor considera que «a obra é máis ben gris marengo —non ten tanto sangue como para chegar ao canón do xénero—, con toques vermellos, verde e morado».
O título máis recente son contos para o público infantil, que están ilustrados por Daniel Méndez Veloso. «Son aventuras da vida dirixidas a rapaces, adolescentes e mozos. Cada conto incide nunha situación para chegar, entre liñas, ao fondo dos problemas. Aspectos como o acoso, violencia de xénero, adoutrinamento e outros aparecen na obra». No acto de presentación da Casa de Galicia en Madrid contouse coa actuación de María do Ceo, que estivo acompañada de José e Álex Salgado.