A gala inaugural logrou un cheo no Auditorio de Ourense
27 sep 2025 . Actualizado a las 05:00 h.O Auditorio Municipal de Ourense vestiuse de gala este venres. Co total das súas butacas ocupadas, comezaba o Festival de Cine de Ourense, o certame cinematográfico máis lonxevo de Galicia. Nesta 30.ª edición apostou por un cine diverso, valente e reivindicativo.
Da man do xornalista ourensán Iván Iglesias e da actriz natural de San Fernando, Ruth Gabriel, os presentadores apostaron por unha gala que navegou entre o galego e o castelán, onde o humor e a solidariedade foron da man durante a hora que durou a inauguración.
Entregáronse dous premios que recoñeceron a traxectoria artística de grandes figuras do cine. O primeiro deles, o premio Chano Piñeiro, foi para a figura de José Manuel Cancela, o compositor galego gañador de cinco premios Emmy, e encargado de compoñer o himno do OUFF. Deullo o músico e picadiscos ourensán John Axiom, que será o encargado de crear unha versión remix do tema que se fixo para o festival. Esta nova sinfonía do certame será interpretada mañá pola Xove Orquestra Ourensanía, e gozará dunha espectacular posta en escena.
Tras o recoñecemento a Cancela, o director artístico do OUFF, Óscar Doviso, subiu ao escenario para celebrar un ano máis o cine na cidade. Non esqueceu dar as grazas a todas as persoas que fixeron posible este festival. «É un soño feito realidade», dixo. «Somos o festival internacional de cine competitivo máis lonxevo de Galicia e debemos estar á altura», apuntou Doviso. Nunha edición que cualificou de «valente e diversa», con historias que chegan de diferentes partes do mundo, o director artístico do OUFF pediu frear o xenocidio que se está acometendo contra o pobo palestino en Gaza, nun auditorio que rompeu a aplausos.
Despois, o director e produtor de cine Javier Veiga sentouse nunha cadeira en pleno escenario para presentar a súa nova longametraxe Playa de Lobos. Cun cubo de flocos de millo, invitou ao público a quedar para gozar da estrea da súa película, que non chegará aos cines ata o vindeiro 5 de decembro.
O segundo galardón da noite foi o premio honorífico de AISGE, entregado pola delegada da Fundación en Galicia, Isabel Blanco, á icónica actriz de dobraxe Charo Pena. No seu discurso tivo palabras de agradecemento para todos os seus compañeiros de profesión, que loitan día tras día por dignificar a súa profesión. Ao igual que Doviso, Charo Pena animou a loitar contra o conflito de Gaza: «Calar o que sucede é unha ofensa para as vítimas que nos converte en cómplices dos asasinos».
Tras unha ovación do público, a música tomou o escenario da man de Bebe e Pablo Novoa, que ofreceron unha actuación sorpresa que puxo o broche artístico á cerimonia. Ao rematar comezou a primeira proxección.
Máis información na páxina 37, na sección de Cultura.