O festival OUFF publica un libro que recompila tres decenios de memoria cinematográfica

O libro Trinta historias e un festival. Memorias dun proxecto coral, da periodista Sonia Torre, é a testemuña e o legado da traxectoria do Ourense Film Festival (OUFF). A obra, presentada este xoves, recompila tres decenios de cine que conforman a memoria dun proxecto colectivo que, como se destacou no encontro, marcou en boa medida a identidade cultural da cidade. O director artístico do OUFF, Óscar Doviso, abriu o acto reivindicando a importancia de investir en cultura, e rendeu unha homenaxe aos directores que lideraron o certame ao longo destes trinta anos, con mención especial a Eloy Lozano, Luis Rivas Villanueva, Fran Gayo e Enrique Nicanor, xa falecidos. Sonia Torre explicou que o obxectivo do libro é ofrecer unha documentación conxunta e accesible sobre o festival, xa que ata o de agora non existía un arquivo unificado que permitise consultar o que aconteceu en cada edición. Abordou o texto desde unha perspectiva xornalística, destacou, para preservar a información como base documental. A obra inclúe resumos de cada edición, gráficos, táboas, palmarés anual e cadernos de rodaxe con referencias ás personalidades que visitaron a cidade das Burgas.

O presidente da Deputación de Ourense —entidade que organiza a cita cultural—, Luis Menor, destacou o carácter colectivo do OUFF e confirmou o compromiso da institución provincial de manter este referente cultural, animando á sociedade e ás demais institucións a unirse ao proxecto. «O OUFF é símbolo da nosa identidade, da nosa cidade, fundamental na vida da nosa provincia», dixo. Subliñou, ademais, o impacto económico e emocional do festival no territorio. Menor considerou a publicación como un instrumento clave para vindicar a capacidade de Ourense de impulsar proxectos culturais de envergadura. O festival continuará a programación deste ano coa gala OUFF Escola, prevista para o 25 de novembro, e xa prepara a súa próxima edición.

---

---

---