La escritora ta acabante d'espublizar «Lo verdadero», llibru más vendíu nel Día de les Lletres Asturianes 2025
10 jun 2025 . Actualizado a las 05:00 h.Lourdes Álvarez, (La Güeria d'Urbiés) ye llicenciada en Filoloxía Hispánica y especialista en Llingua Asturiana pola Universidá d’Uviéu, ye autora de los siguientes llibros de poesía: Aldabes del olvidu (1990), Mares d’añil (1992), Poesía escoyida [1985- 1997] (1997), Como aquella que yeres (2006), Son del tardíu (2006), P’anular los adioses (2018) y Coles señes del agua (2023). Recibió dos veces el premiu de poesía Teodoro Cuesta (en 1992 y 1994) y tamién, en dos ocasiones, el Premiu de la Crítica d’Asturies de poesía n’asturianu (2006 y 2019). En 2023 l’Academia de la Llingua Asturiana concedió-y la tercer edición del Premiu Nacional de Lliteratura Asturiana en reconocimientu a la so carrera lliteraria. Agora, asoleya un poemariu nuevu, Lo verdadero, qu'amuesa una lliteratura nueva na trayectoria de la poeta, ensin escaecer les señes d'identidá de la so lliteratura y que marcaron les sos obres. Pa conocer más fondo sobre esta publicación nueva, falamos con Lourdes.
—«Lo verdadero» ye una obra metafórica y enllena de significaos. Sicasí, la mayor parte de los poemes que lu componen destaquen pola so precisión y sobriedá. Nun dexa de ser chocante atopar esta formalidá aparente amestada cola voluntá esperimental qu’amueses en delles otres pieces. ¿Cuánto hai de voluntá de concisión y cuánto de naturalidá, nesti exerciciu?
—La faceta esperimental del llibru que, de mano, puede llamar l’atención ye consecuencia de la intención de sintonizar la sobriedá espresiva de la que fales cola formal; a lo primero, de la qu’entamaba la escritura, los poemes cuntaben cola puntuación convencional pero fui cayendo na cuenta de que m’estorbaba, que los versos necesitaben llibertá sin otra llende que la páxina y los márxenes d’ella pa que’l llector los lleera a la so manera valiéndose de les pauses versales y d’otres indicaciones non gráfiques.
—El silenciu (o quiciás, los silencios) ye un conceptu fundamental na to obra, trescalando les acepciones y posibilidaes metafóriques clásiques pa ser una fonte de sentíu y un elementu protagonista. ¿Camudó dalgo na to forma d’entender el silenciu a lo llargo de los años que lleves esplorándolu al traviés de la escritura?
—El silenciu ye un llugar onde me siento mui agusto na vida. Na poesía l’aspiración al silenciu ye un resguardu onde esperar la palabra exacta. Pienso qu’esta ambición foi una constante nel mio percorríu como poeta y que nesti llibru nuevu ye más visible.
—Atopamos referencies a la infancia en delles pieces de «Lo verdadero», dacuando amuésense como momentos iniciáticos y otres vegaes paecen suxerir más bien un final. ¿Qué llugar ocupa la infancia nesti poemariu?
—La infancia tien un papel mui importante en Lo verdadero, ye’l tiempu de la verdá, onde se conoz esi vocablu y s’esplora’l so significáu, a veces en contraposición cola mentira, otres como lo auténtico, sagrao o puro. Hai cinco poemes nos que se cuenta situaciones de la infancia nun pueblu y otros nos que s’atopa dalguna alusión a esa etapa vital.
—Tamién s’atopen munches referencies a la madurez que dan una impresión de pensamientu más posao, d’autoconocimientu y de reconocimientu tamién del mundu qu’arrodia a la voz poética. ¿Cuánto hai de biográfico y cuánto de ficción nesta evolución?
—El suxetu poéticu pue tratar munchos temes y dende diferentes perspectives pero la forma d’abordalos si nun se finxe abondo, masque’l poeta/la poeta seya un finxidor/a, la maurez del suxetu biográficu ha contaxar de dalguna manera al suxetu poéticu.
—El llibru presenta una identidá cohesionada que parte de lo íntimo y lo personal ensin dexar de rellacionase colo social, que tamién venceya lo atemporal del recuerdu a l’actualidá. Siguiendo cola dualidá ente’l suxetu poéticu y el suxetu biográficu, ¿entiendes estes tensiones como un mou de desplicate el mundu a ti mesma o más bien como una rempuesta a esta mesma realidá qu’habites?
—Igual en mio nun se dan estes tensiones, ente’l yo personal y el poéticu. Los dos suxetos colaboren na posibilidá de dar vida a la realidá nueva del poema con tiempos y actores diferentes.
—L'acoyida d’esta obra foi mui bona, siendo’l llibru más vendíu nel Día de les Lletres Asturianes 2025. ¿Cómo valores esto?
—Ye motivu d’allegría cuntar con llectores atentos a lo que voi publicando y resulta mui ilusionante pa siguir tentando la creación.
—¿Cómo diríes que se rellaciona esti poemariu cola to obra anterior, recoyida nel volume «Coles señes del agua»?
—En Lo verdadero hai dellos temes abordaos en llibros anteriores, por exemplu la infancia, l’amor, o’l dolor; la diferencia creo que radica qu'a diferencia de llibros anteriores el suxetu poéticu (femenín) sábese muertu yá nel primer poema y dende esa posición narra o recita con mayor llibertá.
—Yes una autora de pesu nes lletres asturianes por drechu propiu, con una montonera premios a les espaldes, incluyíu’l III Premiu Nacional de Lliteratura Asturiana en 2023. La entruga ye obligada, tanto pola to trayectoria y conocencia del panorama lliterariu como pola vixencia que vuelves a demostrar en «Lo verdadero». ¿Qué opines del estáu actual de la lliteratura n’asturianu y cómo ves el futuru de les nueses lletres? ¿Y de la fecha por muyeres en particular?
—La lliteratura n’asturianu, contra vientu y marea, resiste. Lleva resistiendo y afitándose en niveles de calidá bona, en xeneral, masque la llingua vehicular de la mesma nun seya oficial. El futuru d’ella: creadores y llectores va depender de cómo seya la presencia de la llingua y la lliteratura asturiana na enseñanza. Aquellos llectores militantes d'a lo primero tan desapaeciendo y col descensu de población mozo nesti país nuestru si nun se pon remediu falantes/llectores/creadores tamién, por desgracia, van dir a menos. La literatura fecha por muyeres paezme mui pa tener en cuenta pola calidá y, de manera en poesía, poles nueves voces que se van axuntando a les de la llamada xeneración del Surdimientu. Anguaño tamos n’activu persones que nacimos alredor de les décades de los 60-90. Ente les poetes más nueves hai voces mui poderoses. Tamién en narrativa apaecen voces nueves, los premios son, ensin dulda, mui importantes pa dar a conocer valores nuevos n’edá y conteníos.