A baixada da Morena protagoniza o luns borralleiro, no que houbo farrapada
03 mar 2025 . Actualizado a las 21:47 h.O domingo de estrea é importantísimo no ciclo do entroido en Laza. E non é para menos, xa que ese é o primeiro día no que saen os peliqueiros, a figura típica da celebración na localidade. Traxes preparados con esmero, impolutos. Non hai unha mancha, non hai un roto, non hai un descosido. A tea branca mesmo parece que brilla do limpa que está, sen rastro dunha engurra. Aplícase a máxima da roupa dos domingos que tanto se escoitaba no pasado cando o traballo no campo aconsellaban utilizar diferentes prendas segundo o día da semana.
Pero iso foi o domingo. Porque o luns as tornas cambian e o de volver para a casa como se un acabara de saír non é posible. O luns borralleiro non está recomendado estrear roupa, nin sequera levar unha que se queira volver usar. O mellor é tirar de prendas que xa leven tempo amontoadas no faiado porque xa non forman parte do armario. E aínda así, non está de máis levar funda por riba. Tampouco é preciso un esmero especial no peiteado, porque o mellor é levar pucho, e recomendadas son as gafas tipo buzo. Si, esas que se usan para meter a cabeza na auga, porque en Laza auga non hai, pero do ceo chove de todo.
Pola mañá caeron farrapos. Trapos vellos cheos de lama que a xente tira contra os demais: dun lado os veciños, doutro os visitantes. Unha auténtica guerra sucia que dura algo máis dunha hora, momento para o que xa non queda ninguén limpo... ninguén cun anaco de traxe limpo.
Cheos de lama ata as orellas, os entroideiros teñen tempo a mediodía para coller algo de folgos e mudar a roupa. Pero por outra semellante, aínda que máis limpa, porque a tarde tampouco é apta para escrupulosos. Todo comeza coa baixada da Marela, unha vaca (unha cabeza en realidade) de madeira cravada nun pau que se dirixe á praza rodeada de mozos que portan toxos e sacos cheos de terra e formigas ás que lle botan vinagre para que se poñan rabiosas. E daquela comeza de novo a guerra, coas formigas e a fariña voando dun lado ao outro. Mellor para entón que a funda cubra todo ben, evitando buracos polos que poidan pasar as formigas e morder enfadadas como van polo efecto do vinagre. Quen viviu a experiencia di que non é especialmente agradable. A batalla remata co reparto de cachucha, que despois de tanto esforzo toca repoñer forzas antes de que a música dea paso á festa, que se prevé longa.
En Laza volver ter mañá un programa apertado. Os primeiros en saír á rúa serán Os Kokakolas y No Cómbaro, que porán música á mañá mentres non chega o momento da saída dos peliqueiros veteranos. Pola tarde haberá baile coa orquestra Alma Latina e testamento del burro, enterro do entroido e loito dos peliqueiros. Ao anoitecer tocará a charanga Bicoia.