O investigador Xosé Álvarez Castro, o escritor Manuel Rivas e o ilustrador e editor Kiko da Silva foron algúns dos que participaron na primeira xornada
30 abr 2022 . Actualizado a las 05:00 h.Onte arrancou na Deputación de Pontevedra a primeira das xornadas de A (des)memoria nas aulas, iniciativa que achega á comunidade docente recursos cos que abordar co alumnado o acontecido tras o golpe do 36. «Non se pode esquecer para non repetir e máis agora que se produce un claro rearme da ultradereita», remarcou a deputada María Ortega, ao tempo que criticou a eliminación de Xeografía e Historia de Galicia no currículo de segundo de BAC.
O investigador Xosé Álvarez Castro deixou claro que «en Galicia non houbo guerra civil, houbo prácticas xenocidas (...). Sobre 5.000 mortos [foron] axustizados polos sublevados, dos que dous terzos foron paseados sen xuízo». Pola súa banda, o escritor Manuel Rivas defendeu o activismo da memoria como «ferramenta fundamental para a saudade do porvir».
Na xornada de onte, ademais. participou o vicerreitor da UVigo, Jorge Soto, así como Kiko da Silva, ilustrador e editor, Eva Mejuto, escritora e Xulia María Barros, escritora, que abordaron os traballos feitos sobre a Memoria ilustrada de San Simón. As sesións remataron coa proxección do documental ‘Dores', que contou con Coral Piñeiro, directora e guionista, e Maite Martínez Prieto, produtora e guionista.