«Precisamos poñer no centro e reivindicar o labor literario das mulleres»

Tamén aproveitando a efeméride do Día das Escritoras, a Deputación de Pontevedra clausurou este luns a programación de Mulleres de palabra(s) coa presenza no Pazo Provincial de María Oruña, Arantza Portabales e Susana Fortes. «Ningún día mellor ca este para pechar Mulleres de palabra(s), porque precisamos poñer no centro e reivindicar o labor literario das mulleres e avanzar na construción dun mundo igualitario», remarcou Paula Bouzós.

A deputada provincial de Igualdade, tras agradecer ás tres escritoras a súa disposición e colaboración, puxo en valor a «complicidade e proximidade» das autoras «por compartir este obxectivo con nós e por ser tres mulleres que estades a definir o panorama literario actual, cunha voz propia e de moito peso nas nosas letras». Ao tempo, aproveitou para reivindicar a importancia de ler mulleres ante a ausencia de equidade no mercado editorial: «Lede as nosas historias, escoitade as nosas voces, porque temos moito que dicir e moito que contar».

Mulleres de palabra(s) arrancou o pasado marzo co obxectivo de «reivindicar o legado das escritoras, dirixindo a mirada ás palabras coas que contan o mundo con perspectiva de xénero e poñendo en valor o seu papel para, así, poder construír referentes», acotou a deputada.

---

---

---