As Tanxugueiras, embaixadoras de «As Pegadas do Baile», un proxecto pioneiro do bailador Artur Puga
20 nov 2025 . Actualizado a las 16:31 h.A reivindicación do baile tradicional galego será, de novo, un dos eixos da vindeira edición do Culturgal, que se celebrará no recinto feiral de Pontevedra do 28 ao 30 de novembro. Deste xeito, á proposta xa impulsada no 2024 Ven e baila, que movilizou a preto dun milleiro de persoas, sumase este ano un proxecto pioneiro capitaneado polo bailador Artur Puga, quen con As Pegadas do Baile busca que calquera persoa aprenda os pasos básicos do baile tradicional.
Así, Ven e baila configurase como unhas das grandes citas de Culturgal, «unha chamada colectiva a disfrutar e reivindicar o baile tradicional galego», sinalou Puga, quen xunto a Camilo Franco, director de Culturgal, presentaron esta convocatoria aberta que se celebrará o domingo 30 ás 13.30 horas no Pazo da Cultura. Neste punto, Camilio Franco incidiu en que «queremos dar resposta ao interese da xente máis nova, que reivindica a música tradicional e o baile, con esta actividade comunitaria para pasalo ben e perder o medo a bailar».
Con As Tanxugueiras como embaixadoras, As Pegadas do Baile configurase como un proxecto pioneiro que nace ao abeiro de Culturgal coa intención de estenderse posteriormente polos concellos de toda Galicia para ensinar á xente os pasos básicos do baile galego.
A idea é tan sinxela, como efectiva. Cunhas pegadas no chan, calquera persoa poderá aprender estes pasos básicos «que espero levar polos concellos de Galicia, polos centros educativos e por todos aqueles lugares que estén interesados, como os centros galegos, que todo o mundo teña nun cachiño de chan do seu pobo estes pasos para poder aprender os pasos básicos do baile», insistiu Artur Puga.
A aposta do Culturgal polo baile de raíz non acaba aquí, xa que, o mesmo 30 de novembro Fran Sieira presentará coa súa compañía de danza o espectáculo Un baile ceibe (13 horas), así como se desenvolverá un coloquio (14.15 h.) coa participación de Artur Puga, Aida Tarrio -integrante de As Tanxugueiras-, Fran Sieira, Lucía Estévez e VACAburra.