04 ago 2024 . Actualizado a las 05:00 h.
—Dez segundos para a aterraxe! —exclamou a miña compañeira, asomándose pola porta. Mentres, eu voaba arredor daquela persoa enorme. Onde podía picarlle? A miña compañeira seguía coa marcha atrás.
—Dous segundos!
Vin o seu brazo, e aterrei.
Piqueille a esa alma durminte, pero entón, acendeuse a luz. Abriuse a porta. A miña compañeira chocou con ela e caeu ao chan, malferida.
O neno pequeno entrou e, sen decatarse, esmagou á miña amiga, facendo que me sobresaltara. Acababa de matala!
Entón o neno correu cara a moza que piquei, e, coma se cometera un erro fatal, o neno
entre lamentos esmagoume coa súa man, axitando o brazo da moza.
—Mara, tiven un pesadelo!
Ana Díaz Martínez. 15 anos. Ponteareas.