As letras galegas sairán ás rúas e ás prazas do casco vello da cidade nestes días previos á conmemoración do 17 de Maio. Será da man do programa Esperando as letras , unha proposta cultural na que coinciden as iniciativas pública e privada co fin de dinamizar espazos da cidade e a lingua galega no entorno da celebración da súa festividade. Trátase de achegar ao cidadán actividades de animación á lectura, obradoiros, contacontos e encontros con escritores e ilustradores. Os puntos de referencia serán a carpa que xa se instalou na praza de Cervantes e a que se porá no Toural o venres e o sábado, aínda que tamén haberá actividades en locais do casco vello.
Detrás desta iniciativa están as concellerías de Cultura e de Rehabilitación, dirixidas polos nacionalistas Néstor Rego e Socorro García, así como a Federación de Libreiros de Galicia, a Asociación de Escritores en Lingua Galega e os distintos locais privados que compoñen a Asociación Cultural Cidade Vella.
O programa arrancou xa o luns con manualidades e sesión de contacontos na carpa de Cervantes, onde onte houbo tamén unha charla co ilustrador Pepe Carreiro. Ao mediodía de hoxe, nese mesmo punto, a editorial Sotelo Blanco promove un encontro con nenos para traballar sobre o libro A rebelión das rúas , que fala das rúas máis emblemáticas de Santiago e o significado de moitos dos seus nomes. Xa pola tarde, ás 18.00 horas, haberá un obradoiro de papiroflexia.
Mañá haberá unha completa xornada de actividades. Manuel Núñez Singala, xefe do departamento de normalización lingüística da USC, dará unha charla ás 12, mentres que Carlos Negro dirixirá un obradoiro de poesía para os rapaces. Máis tarde, ás 18.00, volverá a papiroflexia e ás 20 horas presentarase o libro Fundación Bautista Álvarez .
O venres e o sábado o programa estenderase xa a outros puntos, aínda que Cervantes seguirá a ser un referente importante. Ao longo do día alí haberá contacontos, de novo obradoiro de poesías e se presentará a revista Retranca . Pero logo das oito da tarde a actividade trasladarase a varios locais da zona vella. A esa hora, no Modus Vivendi, o escritor e crítico musical Xoán M. Carreira presentara o primeiro libro en galego sobre Beethoven, Ludwig van Beethoven: As [8+1] Sinfonías , e ás 21.00, o escritor e poeta Vicente Piñeiro recitará poemas do libro Poemas con historia . A esa hora tamén o escritor e poeta Alberte Momán fará unha lectura de textos de poesía no pub Momo e o escritor Álvaro Lago lerá narracións do seu último traballo O espello do gato , no Metate.
O Concello quere darlle continuidade a este iniciativa nos anos vindeiros, e incluso mellorala con novas propostas. Segundo Néstor Rego, o proxecto nace coa intención de ofrecer cobertura pública ás actividades literarias que as librerías adoitan promover no entorno da celebración do Día das Letras.