Nauta Teatro amosa en Teo e Santiago o resultado da investigación sobre a identidade de xénero
SANTIAGO
A compañía presenta os días 19 e 20 as conclusións do traballo iniciado o mes pasado con vinte persoas
16 ene 2024 . Actualizado a las 04:55 h.«Non é un espectáculo, non é unha obra ensaiada, senón unha proposta escénica con persoas que queren reflexionar sobre a identidade de xénero desde o teatro comunitario». Así resume Rafael Rey, membro de Nauta Teatro, o resultado da iniciativa impulsada por esta compañía compostelá que poderá verse o día 19 no auditorio Constante Liste de Teo e o día 20 na Gentalha do Pichel en Santiago a partir das 20.00 horas en ámbolos dous casos. Trátase de ofrecer as conclusións da investigación feita desde o ámbito das artes escénicas sobre a identidade de xénero e a diversidade.
Para levar a cabo este proxecto, que conta con financiamento do Fondo de Festivais Europeos para Artistas Emerxentes, membros de Nauta comezaron a traballar a principios de decembro con artistas locais, artistas amadores e persoas implicadas na visibilización do colectivo LGTBIQ+. «Preparamos este proxecto para facer unha experiencia comunitaria que puxera en cuestión a expresión de xénero, os estereotipos e as máscaras sociais que temos en relación co xénero», asegura Rafael Rey. O elenco está integrado desde profesionais ou afeccionados que levan 30 anos no teatro como por persoas que nunca se subiron ás táboas cun amplo abano de idades: desde os 14 ata máis de sesenta.
A compañía compostelá creada no 2020 amosa o seu interese por traballar «temáticas sociais e actuais». Neste caso, apuntan que despois de abordar a homofobia, a transfobia e o «bulling» no 2021, quixeron profundar máis na temática, centrándose na identidade de xénero nun proxecto no que contan coa colaboración do artista drag Nico Elsker. «Trátase de facer desde o teatro comunitario unha investigación sobre a expresión da identidade, como se representa o xénero desde a arte», apunta Rafael Rey.
A iniciativa, que se enmarca tamén dentro do festival Galicreques, amosará o resultado esta semana en Teo e Santiago, seguido dun coloquio co publico. Será unha proposta escénica onde desde o movemento e con máscaras se abordarán situacións ligadas ao xénero e aos distintos arquetipos. Inclúe tanto escenas cómicas como dramáticas. Por parte de Nauta tamén participan Raquel Garabal, Pilar Pingarrón e Carlos Gallardo. Ademais, colaboraron Lorenzo Negueruela e Adela Bértolo.