Peregrinar á excelencia é o noso camiño!
SANTIAGO
A nosa área sanitaria está en continua evolución co obxectivo de ofrecer solucións ás necesidades dos/as nosos/as pacientes, tanto da sanidade pública compostelá como dos que se achegan ata nós na procura de cura aos seus problemas de saúde desde outros ámbitos territoriais. Ese é o noso camiño.
Seguimos a traballar en busca da excelencia na asistencia, na docencia e na investigación para aportar novas respostas a novos e vellos problemas de saúde con especial atención aos procesos de calidade. O talento dos/as profesionais sanitarios e non sanitarios é a mellor garantía de que ese obxectivo é alcanzable. Temos moitos retos por diante, entre eles, por á disposición dos/as traballadores/as e dos/as pacientes unhas infraestruturas que nos permitan seguir a perfeccionar a asistencia e os coidados. Tanto no ámbito do CHUS (hospitais Clínico, Gil Casares, Médico Cirúrxico de Conxo e Psiquiátrico) coma no hospital da Barbanza temos que avanzar na humanización dos edificios para xerar espazos de traballo e de apoio específicos para pacientes e profesionais. Ese esforzo na modernización das instalacións xa se está a ver en moitos dos nosos centros.
O CHUS ten como sinal de identidade ofrecer solucións á complexidade sanitaria, sendo referencia de moitos procesos asistenciais tanto a nivel da nosa comunidade como nacional. O noso modelo é o dos grandes centros hospitalarios europeos, lugares de excelencia baseada nos tres piares (asistencia, docencia e investigación). Instalacións hospitalarias multicéntricas que se van especializando a medida que aumentan a súa complexidade e forman unha rede asistencial coa atención primaria e demais dispositivos asistenciais.
Sen embargo, estes espazos non son escenario suficiente para realizar o noso traballo. Temos que acceder tamén ao domicilio dos pacientes, aos centros sociosanitarios e á comunidade e contamos xa con ferramentas tecnolóxicas que nolo permiten e nas que Galicia foi pioneira.
No ámbito da docencia e a investigación, o IDIS e a USC son cómplices imprescindibles para xerar ese lugar de coñecemento que aporte aos/ás doentes a tranquilidade de sentirse ben atendidos/as nos seus centros sanitarios. Temos que facer compatibles o fonendoscopio e a protonterapia, e debemos investigar na procura de novas e mellores solucións aos problemas de saúde dos/as nosos/as pacientes. Facer fronte ao sinxelo e ao complexo, ao frecuente e ao minoritario, ao colectivo e ao individual.
Temos que reinventarnos e seguir na procura da excelencia ao tempo que nos nutrimos da innovación e dun cambio xeracional que nos axude a afrontar o futuro. Para deseñar ese camiño é imprescindible escoitar os/as profesionais, os/as pacientes e á sociedade. Construír a nosa sanidade pública é moito máis que levantar ou ampliar edificios, pero estes son necesarios e, no noso caso, imprescindibles. Na actualidade estamos acometendo as obras de crecemento no Bloque C do Hospital Clínico, dedicado basicamente ás Consultas Externas, que permitirá aportar múltiples melloras, como a Unidade de mama, Hospital de día médico, Unidade da dor, Unidade de Reprodución Humana Asistida, entre outras. Vaise proceder á climatización das áreas de hospitalización do hospital médico-cirúrxico de Conxo para facilitar as condicións dos pacientes e dos profesionais. Estamos a rehabilitar as instalacións do hospital psiquiátrico de Conxo e tamén se está a remodelar integralmente e ampliar o centro de saúde de Conxo. Imos construír, dentro da primeira fase do plan de infraestruturas sanitarias, un novo centro de saúde en Noia e outro en Teo.
Non podemos esquecer que recentemente vimos de poñer en marcha o Centro Integral de Saúde de Lalín para achegar aos/ás pacientes servizos que faciliten a accesibilidade e polo tanto a equidade, ademais dunhas modernas e cómodas instalacións que sen dúbida redundan no benestar de doentes e profesionais. Imos dotar dun hospital de día onco hematolóxico ao Hospital do Barbanza, o que beneficiará a numerosos doentes que ata o de agora se tiñan que desprazar ata Santiago para recibir tratamento.
Estamos a traballar para poder dispor canto antes dun edificio específico dedicado ao crecente e imparable colectivo de investigadores sanitarios do Instituto de Investigación Sanitaria de Santiago (IDIS).
Moitas son as tarefas e moitos son os retos. Sen ningunha dúbida a sanidade pública da nosa área sanitaria ten un intenso día a día. Cada xornada centos de pacientes son intervidos nos nosos quirófanos. Milleiros de persoas acoden ás nosas consultas tanto de Atención Primaria como de Atención Hospitalaria. Uns mil doentes permanecen ingresados cada día nos nosos hospitais (no CHUS e no da Barbanza). Máis de mil persoas solicitan atención nas nosas urxencias (tanto nos PACs, coma nos hospitais). Hai incidencias todos os días... e a pesares do frenesí cotiá, non podemos deixar de traballar na planificación e no futuro que precisa e merece toda a poboación da nosa área sanitaria.
Para iso, nas próximas semanas poremos en marcha a elaboración do plan funcional da nosa área. Definindo o que necesitamos e o xeito de solucionalo. Buscamos a creación dunha identidade e de avanzar no orgullo de pertenza a unha gran organización. Un proxecto de todos, por todos e con todos.
Son múltiples as actuacións para resolver moitas necesidades. Un camiño que precisa da incorporación de novos traballadores e, por suposto, de novos perfís profesionais.
Peregrinar á excelencia é o noso camiño!