Regístrate gratis y recibe en tu correo las principales noticias del día

O proxecto «Modo galego, actívao!» engancha á rapazada de Ames

O. P. SANTIAGO / LA VOZ

AMES

Alumnado do colexio Agro do Muíño nunha das actividades do proxecto
Alumnado do colexio Agro do Muíño nunha das actividades do proxecto

Concello amiense e Real Academia Galega impulsan unha iniciativa que achega a lingua galega a máis de 2.000 estudantes

09 feb 2025 . Actualizado a las 19:07 h.

No ano 2023, o Concello de Ames e a Real Academia Galega (RAG) puxeron en marcha o proxecto Modo galego, actívao!, unha proposta de dinamización lingüística que implica, xunto ao alumnado e profesorado de infantil e primaria, ás familias e persoal municipal que atende decote aos cativos: era a intervención que seguía ao diagnóstico da situación do galego na infancia plasmado no 2021 no mapa sociolingüístico escolar de Ames.

Esta terceira edición chega cunhas actividades redeseñadas trala avaliación das experiencias previas a cargo do seminario de Sociolingüística da RAG. A nova folla de ruta propón retos diarios diferenciados para infantil e primaria que achegan a máis de 2.000 nenos á lingua de maneira lúdica, animándoos a empregar o galego de forma cotiá. Logo de tres das catro semanas de programación, constátase unha maior adhesión tanto dentro coma fóra das aulas, grazas tamén, salientan as institucións promotoras, á colaboración de personalidades como o músico Xabier Díaz, Tanxugueiras, Paco Nogueiras, Ce Orquestra Pantasma e Fátima Pego; as actrices e contadoras Vero Rilo e Bea Campos; a tiktoker Nuria Grandío (@konachadas); Peter Punk; os docentes e músicos Alonso Caxade e Manolo Maseda; o especialista en toponimia Vicente Feijoo; a actriz e cantante Antía Castro; ou seres máxicos como o Apalpador e o Pandigueiro, que preséntanlles novos retos.

Os rapaces convértense en publicistas que crean lemas para promover que a xente fale máis galego, inventan definicións divertidas de palabras, examinan a activación do galego nos seus pais e escriben cartas a empresas e entidades para que empreguen máis e mellor a lingua. E o programa engancha: «Durante este curso a participación está sendo moi alta, tanto por parte do profesorado coma do alumnado e das súas familias», sinala a directora do colexio Agro do Muíño, María Carmen Liñares. Algo que se estende a outros centros, confirma a RAG. Este curso o programa levouse experimentalmente aos dous primeiros cursos da ESO, nos institutos de Ames (Bertamiráns) e O Milladoiro.