Santiago e Padrón presumen de «clima de concordia» e dun «camiño magnifico»
PADRÓN
As Festas do Apóstolo repetiron a tradicional visita que a corporación padronesa fai a Santiago para manter uns lazos históricos que están moi vivos
29 jul 2025 . Actualizado a las 05:00 h.Rosalía de Castro naceu en Santiago e finou en Padrón. Milleiros de peregrinos chegan a Compostela despois de pasar por Padrón e xeracións de estudantes da capital do Sar remataron a súa formación na Universidade de Santiago. E cada domingo, o mercado do Espolón énchese de composteláns que tamén gozan da Pascua e da Festa do Pemento.
Todas estas razóns amosan a estreitísima vinculación que teñen as xentes de Santiago e de Padrón. Por iso, un dos actos institucionais das Festas do Apóstolo que non perde peso nin protagonismo é a recepción que fai a corporación de Santiago á institución irmá de Padrón, unha cerimonia oficial e solemne que sempre comeza coa recepción na praza do Obradoiro, ás portas de Raxoi. Segue co intercambio de bastóns e pendóns, continúa cos discursos no salón Vermello, verbas que dan paso ao saúdo desde o balcón e remata coas músicas de cadansúa banda, e sen que este ano soase o himno de España, como xa aconteceu en Compostela nas mesmas cerimonias do mandato
Como anfitrioa, a rexedora, Goretti Sanmartín, deu a benvida á corporación padronesa recoñecendo que para Santiago onte foi «un día moi importante», porque a historia entre ambas localidades vai máis alá, dixo, «do intercambio de bastóns e de pendóns».
Para Sanmartín, a aposta común por «prestar importancia ás voces anónimas» e tamén «pola memoria democrática e a igualdade», fan que os dous concellos compartan un «camiño magnífico» que amosa «a vontade de continuar construíndo vidas máis xustas e libres e avanzando cara a transformación social e a igualdade», engadiu..
Anxo Arca, rexedor padronés, devolveu os agradecementos e recoñeceu o valor histórico do acto, aludindo tamén á estreita e frutífera relación institucional, o que fixo que Arca recoñecese a colaboración recibida en tarefas da xestión do Concello, como a de sacar adiante o proceso de estabilización do persoal municipal para o que pediron asesoramento a Santiago. E como xa adiantara semanas atrás, Padrón tamén mira a Compostela para «tratar cousas relacionadas coa taxa turística e a xestión do turismo, unha realidade que tamén compartimos».
O representarte padronés incidiu expresamente no «clima de concordia» entre ambos concellos, algo a que deu un especial valor, «nestes temos que vivimos de confrontación».