Carlos Portela e Lidia Fraga: «Unha das cousas boas de ''A lei de Santos'' é que non sabes o que vai pasar»

h. r. REDACCIÓN / LA VOZ

SOCIEDAD

Os creadores din que o personaxe interpretado por Monti Castiñeiras está «á marxe da lei, pero con certa ética»

19 sep 2021 . Actualizado a las 05:00 h.

Santos será quen de abandonar a súa vida criminal e levar unha vida honrada? A resposta a esta e outras preguntas sobre as personaxe de A lei de Santos manterá aos espectadores galegos pegados á pantalla. O argumento da serie producida por Voz Audiovisual, que hoxe estrea en TVG a súa segunda temporada, é obra do traballo conxunto de Carlos Portela e Lidia Fraga.

-É moi difícil enfrontarse a unha segunda temporada dunha ficción como «A lei de Santos»?

-Carlos Portela. Eu pensaba que só habería unha temporada de Santos, pero como a acollida foi tan boa que enfrontamos o desafío de pensar como podía continuar. Por sorte é moi agradable de escribir e cólleslle cariño moi rápido.

-Lidia Fraga. Na primeira temporada fixemos unha pequena desfeita que había que reconducir de algunha forma [ri]. As miniseries teñen un concepto e unha estrutura diferentes aos das series. Non é o mesmo escribir algo como Serramoura que escribir unha segunda temporada dunha ficción pensada para unha soa. A lei de Santos é unha serie moi divertida de facer, polo que esperamos que iso acabe chegando aos espectadores.

-Cales son os principais conflitos que moven a trama desta temporada?

-Carlos Portela. Unha das cousas boas de A lei de Santos é que nunca sabes o que vai pasar. Sen facer spoiler, nesta temporada veremos o intento de reconversión de Santos. Que é o que pasa? Que ao final cada un é como é [ri]. Nesta ocasión é como volver ao comezo para volver con máis forza e axustar contas co pasado, que no caso de Santos ten máis de un.

-Lidia Fraga. Santos é o pistoleiro que decide abandonar as pistolas e deixar o crime pero non deixan que o faga. Por un lado, uns non se fían del e, polo outro, os seus colegas criminais están preparando o atraco do século e queren contar con Santos. Santos non busca problemas pero os problemas acaban por atopalo.

-A personaxe de Santos conectou moi ben cos espectadores galegos. Como se pode explicar esa empatía?

-Lidia Fraga. Eu creo que a clave foi unha combinación de factores. Por un lado, Alberto Guntín, Xosé Morais e Víctor Sierra -o equipo de guionistas que crearon Serramoura- construíron unha personaxe chea de contradicións. Santos é irreverente, politicamente incorrecto e cando fala sube o pan [ri]. Outro factor moi importante foi tamén o que fixo Monti Castiñeiras coa súa interpretación, porque el tamén é responsable de crear esa relación tan especial cos espectadores.

-Carlos Portela. Para min a sensación desde fóra é que os malos sempre molan moito. Se ti nunha serie tes un bo malo, xa tes medio camiño andado. No caso de Santos non so é que teña a liberdade de facer o que lle peta, senón que tamén ten certa chulería simpática, pero tampouco é un tipo totalmente amoral.

-«A Lei de Santos» pode englobarse dentro do wéstern ou, neste momento no que a combinación de xéneros é unha constante, non tería sentido?

-Lidia Fraga. Hoxe en día é moi complicado atopar xéneros puros en televisión, porque todo está mesturado. Santos ten elementos de thriller, de comedia, de wéstern, de drama, de acción... E todos eses elementos combinan moi ben e enriquecen a narración.

-Carlos Portela. O wéstern é un xénero que admite moitos rexistros e, por esa banda, ten ese aire buscado. Ademais, a personaxe de Santos ten ese punto de estar á marxe da lei, pero con certa ética. O wéstern permite meter elementos de comedia que axuda a rebaixar a rudeza que teñen as historias de Santos e contar a vida de Viladesantos.

A segunda temporada do wéstern «A lei de Santos» comeza este domingo en Televisión de Galicia

A segunda temporada de A lei de Santos comeza esta noite en TVG, a partir das 23 horas, con Monti Castiñeiras de novo á fronte deste wéstern. Con todo o que aconteceu na primeira temporada da serie -a inesperada morte de Pancho, o duro enfrontamento con Antonia, ou o descubrimento de que tiña unha filla, Garda Civil de profesión- Santos viuse na obriga de ter que decidir seguir sendo un temido delincuente, ou deixar a profesión e levar unha vida honrada como Mario Piñeiro.

Xa en Viladesantos, a súa vila natal, Santos reencontrarase cos seus compañeiros de aventuras, Peixe e Abel; e con Emilia, a filla dun vello amigo que os espectadores coñeceron en Serramoura.

A pesar de que Santos os fai partícipes das súas dúbidas existencias, os problemas que ten Peixe cun perigoso delincuente local, colócao ante o seu primeiro dilema: manterse á marxe da situación do seu amigo ou axudalo, aínda que iso supoña o feito de verse envolto nun roubo que terá como protagonista o Pazo de Meirás.

Monti Castiñeiras, Andrés Giráldez, Federico Pérez e Iria Veiga encabezan o reparto da serie, no que se atopan outros intérpretes como Óscar Allo, Iria Sobrado, Marcos Vieítez, Lois Soaxe, Iris Darriba, Sara Sanz, Paula Morado, Xúlio Abonjo, Victoria Teijeiro, David Seijo, Ana Oca, Roque Ruiz, entre outros.

A serie conta co argumento escrito por Carlos Portela e Lidia Fraga, baixo a dirección de Ozo Perozo e Manuel A. Espiñeira.

A través de Internet, no portal virtual EnSerie.gal pódense ver baixo demanda esta e outras series propias da Televisión de Galicia, con títulos xa históricos e tan destacados como Mareas vivas, Pratos combinados, Matalobos, Serramoura, Vidago Palace e Auga Seca.