A coruñesa Mariña Pérez e a madrileña Ángela Álvarez, Premio Internacional de Poesía Carlos Oroza en galego e castelán
VIGO
Mercedes Peón recollerá o recoñecemento á mellor iniciativa musical de divulgación da poesía no acto que se celebrará o 24 de outubro no Museo do Mar de Vigo
17 oct 2025 . Actualizado a las 20:07 h.A galega de Ames (A Coruña) Mariña Pérez, e a madrileña Ángela Álvarez son as gañadoras da segunda edición do Premio Internacional de Poesía Carlos Oroza, nas modalidades de galego e castelán, respectivamente, ao que se presentaron máis de mil traballos de Galicia (120), do resto de España (488) e unha importantísima representación internacional (403), destacando principalmente os procedentes de países hispanoamericanos. Os premios teñen unha dotación de 6.000 euros cada un e os galardoados recibirán unha figura de Oroza realizada en bronce pola artista Cuqui Piñeiro.
A lectura do fallo dos xurados tivo lugar hoxe no local da Asociación Évame Oroza en Vigo, coa participación do director xeral de Cultura, Anxo Lorenzo; a delegada da Xunta de Galicia en Vigo, Ana Ortiz; a vicepresidente da Deputación Provincial de Pontevedra, Luisa Sánchez, e o presidente da asociación Évame Oroza, Xabier Romero.
O presidente de Évame Oroza ademais de dar as grazas a Xunta de Galicia e Deputación Provincial de Pontevedra polo seu apoio ao premio «xa que permite que sexa unha realidade», referiuse a gran participación recibida, superando tamén nesta segunda edición os 1.000 poemarios. Romero destacou a presentación de 403 traballos dende fóra de España, «o cal demostra que este premio ten un claro carácter internacional con 20 países de Latino América, destacando Arxentina, México ou Chile, entre eles polo número de participantes». Pola súa banda, o director xeral de Cultural, Anxo Lorenzo, tamén agradeceu o traballo da asociación Évame Oroza, porque «non é so a casa de Carlos Oroza, senón unha casa da cultura, que, dende o Casco Vello de Vigo, funciona como un foco de irradiación de cultura», mentres Luisa Sánchez, vicepresidenta da Deputación, dixo que 1011 poemarios presentados «»é sinal de que a poesía está viva e é unha magnífica homenaxe a Carlos Oroza. É un recoñecemento a ese poeta indómito e libre, cunha poesía chea de paixón».
O poemario Unha aria no asedio, de Mariña Pérez Rei, foi a obra elixida por unanimidade polo xurado da modalidade de galego, composto por Silvia Penas, Patricia Meira e Samuel Merino. Na acta, o xurado valora que «é un poemario cun código poético traballado e certeiro, que propón un transunto entre a arte, a lingua, a música e a vida mesma. Rico en imaxes e cun ritmo engaiolante que tensa o fío do principio ao fin coma unha arpa ben afinada que deixase múltiples notas para tocar cada milímetro do cosmos». Mariña Pérez Rei é docente e escritora amesá, con unha traxectoria que transita entre a poesía, a narrativa breve e a colaboración xornalística. En 2005 recibe o Premio Eusebio Lorenzo Baleirón polo poemario Fanerógama, e un ano despois o Premio Manuel Lueiro Rey coa novela curta Canícula. Entre os seus títulos poéticos figuran tamén Apuntamentos para un cuarto confuso e cambiante (edición artesanal) e Paquidermo.
Co libro Costa necrópole acada o Premio Antón Avilés de Taramancos, e participa nas antoloxías poéticas da corrente Sentimentalista. Publica, ademais, a novela Contrapicados e o poemario Boca de gárgola (autoedición).
Nos últimos anos deu ao prelo unha nova achega poética, Mallantes, e colaborou co Colectivo Maiakovski na edición do longo poema Intimidación. En 2023, con Finximentos, obtivo o Premio de Narración Curta Ánxel Fole, consolidando unha voz singular dentro da literatura galega contemporánea.
Modalidade de castelán
A obra Notas de Cereté, de Ángela Álvarez Sáez, foi elixida como gañadora do Premio Carlos Oroza na modalidade de castelán. O xurado, formado por Manuel Bragado, Rexina Vega e María Xosé Porteiro, destacou da obra que «baixo a forma de diario, unha voz feminina indaga no suxeito poético contemporáneo, e dende unha perspectiva de muller explora a relación entre corpo e literatura». Destacan tamén a unidade e vertebración do proxecto, cunha estrutura sólida e ao mesmo tempo variada, flexible e sorprendente. Ángela Álvarez Sáez (Madrid, 1981) é licenciada en Dereito e avogada. No ano 2005 formou parte da Fundación Antonio Gala para Jóvenes Creadores, onde obtivo unha bolsa de creación literaria.
É autora de quince poemarios, seis deles galardoados en certames internacionais, entre os que destacan La torre de las tortugas (Premio Antonio Carvajal, 2006), La estación de las Moras (Premio Carmen Conde, 2017), Libro de la nieve (Premio María del Villar, 2017), Palabra vegetal (Premio Blas de Otero?Villa de Bilbao, 2018), La casa salvaje (Premio León Felipe, 2019) ou Canción de cuna (Premio Universidad de Alcalá, 2023). En 2022 publicou o seu primeiro libro en prosa, Los bosques violentos (Las migas también son pan), e ten prevista para 2025 a saída de Ahora somos bosque (Balduque).
Mellor iniciativa musical
No transcurso do acto tamén se anunciou o «Recoñecemento á mellor iniciativa musical de divulgación da poesía» que nesta segunda edición foi concedida a Mercedes Peón pola súa traxectoria musical e creadora, polo seu labor como compiladora e transmisora do legado das mulleres anónimas que mantiveron vivo o canto, a música e o baile en Galicia.
Destaca tamén pola súa brillante carreira como compositora e intérprete, marcada por un espírito innovador que soubo conectar a tradición coa contemporaneidade, explorando novos camiños sonoros e expresivos dende unha clave profundamente persoal, comprometida coa sociedade e co feminismo.
O premio non ten dotación económica e consiste nunha peza realizada ex professo polo artista Xabier Magalhães, así como unha figura de Oroza feita en bronce pola artista Cuqui Piñeiro.
O venres 24 de outubro (20.00 horas) celebrarase, no Museo do Mar de Vigo, a gala de entrega do Premio Internacional de Poesía Carlos Oroza, na que o dúo Cintaadhesiva (Silvia Penas e Jesús Andrés Tejada) porá a nota musical nun evento cheo de poesía e arte. A entrada é libre ata encher o aforo.