![](https://img.lavdg.com/sc/8MY7Kwrl208veTKJB10Unzv2WQA=/480x/2023/02/22/00121677087541990544734/Foto/A17G2029.jpg)
O director e o ciclista do Tavfer Ovos Matinados Mortágua salientan o valor da cita máis aló das súas catro etapas
23 feb 2023 . Actualizado a las 05:00 h.Jonas Vingegaard, gañador do último Tour de Francia, co seu Jumbo Visma, Movistar, Astana Qazaqstan Team, Cofidis... e o Tavfer Ovos Matinados Mortágua polo medio co vilagarcián Gustavo César Veloso en funcións de director deportivo, e co cambadés Ángel Sánchez na dun dos seus sete homes nas carreteiras polas que discorrerá a segunda edición de O Gran Camiño. O proxecto que Ezequiel Mosquera, o ex corredor profesional de Teo e hoxe empresario de organización loxística de eventos deportivos, puxo en marcha con intención de recuperar o espírito e calidade daquela Volta a Galicia dos anos 80 e 90 do pasado século, e atraer progresivamente o mellor do pelotón internacional. Este ano, coa escadra continental de Veloso e de Sánchez entre os catro equipos portugueses convidados.
Na antesala da primeira etapa, que hoxe cubrirá 188 quilómetros entre a Muralla de Lugo e Sarria, Gustavo César Veloso recoñecía que poder participar no Gran Camiño «faime especial ilusión». Sobre todo, por canto, sinala: «Non corrín a Volta a Galicia nin como profesional nin como afeccionado. Aquí coñezo o percorrido enteiro como a palma da man, e sei que vai haber un montón de xente animando nas estradas».
O Tavfer chega á cita galega tras ter asomado a cabeza a semana pasada nos cinco días da Volta ao Algarve, metendo a corredores nas escapadas boas de dúas etapas. Con todo, a carreira de fondo da escadra de Veloso, como non podía ser doutro xeito para un equipo continental como o seu, será a Volta a Portugal. E sempre, en cada proba, di o vilagarcián na súa segunda temporada de director deportivo: «Temos que ser un equipo organizado, que se vexa que está traballado e dea boa imaxe» por riba das vitorias, oito o ano pasado.
Unha delas foi a que Ángel Sánchez conseguiu na casa, na Clássica Pedro Silva de Mortágua. O cambadés, decimo terceiro na xeral da última Volta a Portugal, na que se mantivo varios días no Top 10, chega ao Gran Camiño curto de forma, logo de ter que parar mes e medio na metade da pretemporada por un golpe no xeonllo dereito mentres adestraba. É por iso que, confesa, lle tería gustado moito máis correr a proba na súa terra en xuño e en plenas facultades: «O Gran Camiño tiene mucho valor, es importante que vuelva a haber ciclismo profesional en Galicia. Es una carrera con muy buena participación, muy bien organizada y etapas preciosas. Pero también muy dura, para escaladores y con una meteorología adversa. Tal y como llego, para mí coger alguna fuga y terminar sería lo ideal».
Máis aló disto, este ano Ángel, que nega a etiqueta de xefe de filas do Tavfer que algún lle atribúe, aspira a rematar entre os dez mellores da vindeira Volta e, por que non, tentar gañar algunha etapa.