Ao rematar o pregón terá lugar a ofrenda floral ao patrón na praza de España
11 ago 2023 . Actualizado a las 05:00 h.As festas patronais de San Roque en Vilagarcía despegan hoxe cunha axenda ateigada de actos. O inicio será ás 20.30 horas na praza de Ravella coa lectura do pregón, que este ano realizará a xornalista María Foscaldo, máis coñecida en redes sociais como MeryFos. Afincada en Vilagarcía dende hai anos, suma máis de 150.000 seguidores en TikTok e Instagram, onde popularizou a personaxes de creación propia como Virtudes de Galiñanes, alias A repunante. A pregoeira adiantou que tratará de facer un pregón divertido e no que non se descarta que poida facer acto de presenza a mesma Virtudes. A lectura traducirase simultaneamente á lingua de signos, segundo informa o Concello.
En Ravella reuniranse, como de costume, a Banda de Música de Vilagarcía e as agrupacións sociais e culturais que, unha vez rematado o pregón, se desprazarán camiñando ata a praza de España para participar na ofrenda floral ao patrón. A comitiva desfilará polos xardíns de Ravella, a rúa Ramón y Cajal, a praza de Galicia, as rúas Castelao, Xeneral Pardiñas e Covadonga para rematar ante a igrexa de Santa Baia de Arealonga, onde ás 21 horas comezará a homenaxe a San Roque.
A esa hora subirase ao escenario do auditorio municipal Leo Bassi para inaugurar oficialmente o Festaclown. Este ano trae a Vilagarcía o seu último traballo, «70», no que a través da súa memoria descóbrenos que hai que volver ao humanismo e aos instintos.
Tampouco faltará a música no primeiro día do San Roque. A cita será ás 23 horas no parque da Xunqueira co concerto gratuíto de Don Patricio. O rapeiro canario, coñecido anteriormente como El Crema, é un dos talentos máis virais da música española actual e un dos artistas máis escoitados en Spotify desde 2019, cando lanza Contando lunares. Por este éxito foi nomeado nos 40 Music Award, nos Premios da Música Odeón e nos Premios Tu Música Urbano, obtendo finalmente o galardón de Mellor Artista Urbano 2019.