O Cortegada recibe a un León coa mvp e as dúas máximas anotadoras da Liga
AROUSA
Javi Nogueira mantiña onte as dúbidas de Ángela Coella e de Aleksandra Stojanovska
28 oct 2023 . Actualizado a las 05:00 h.A segunda comparecencia en Liga do Mariscos Antón Cortegada na súa cancha provisional do Pavillón Municipal de Fontecarmoa 2 enfróntao esta tarde, desde as 19.30 horas, o Mipelletymas BF León. Un duelo do máis atractivo, por varias razóns.
A primeira, a defensa do conxunto vilagarcián da cuarta praza na clasificación, a que fixa o corte de entrada á fase de ascenso, fronte a un rival un posto por debaixo co mesmo balance de 2 vitorias e 1 derrota.
A segunda boa razón para achegarse esta tarde ata Fontecarmoa 2 é a presenza nas filas leonesas da a día de hoxe xogadora máis valiosa do Grupo A da Liga Femenina 2, a á-pívot dominicana Cesarina Lisbeth Capellán, que resulta ademais a máxima anotadora do campionato, cun promedio de 22 puntos por encontro. A súa compañeira de vestiario e directora de xogo do BF León Florencia Niski figura xusto por detrás na táboa de anotadoras con 19 de promedio.
O Cortegada, que o martes tivo que desprazarse a Portas para poder adestrar ante a condensación en Fontecarmoa 2, estaba onte moi pendente da evolución de Ángela Coello, logo de sufrir o xoves unha escordadura nun nocello. Ademais, Aleksandra Stojanovska tivo un pinchazo nun isquiotibial que obriga a ser precavidos co seu estado.
Sobre o papel, agárdase un duelo moi disputado entre dous equipos que apostan polo mesmo baloncesto, cómodos presionando, correndo e xogando a moitas posesións de balón.