«Sempre Rosalía» representarase en quince centros culturais
18 feb 2025 . Actualizado a las 05:00 h.A concellería de Cultura, dirixida por Sonia Outón, deu a coñecer onte na sociedade O Gato Negro do Carril a proposta teatral «Sempre Rosalía», unha iniciativa que busca lembrar o aniversario do seu nacemento, o 23 de febreiro. O Concello organizará este espectáculo itinerante, que visitará diversos espazos culturais dende o venres 21 ata o domingo 23.
A peza, producida por Producións Dispersas, ten unha duración de vinte minutos e está destinada a público de todas as idades. Segundo Outón, a representación correrá a cargo de Ana Ponte, no papel de Rosalía de Castro, e Diego Freire, que encarnará un dos seus biógrafos. A obra desenvolvese a través dun diálogo no que a ironía e a poesía se mesturan para presentar unha imaxe renovada da autora. Ademais dos seus propios versos, incluiranse fragmentos de outros escritores significativos. Un dos primeiros escenarios será O Carril, un lugar de especial valor para a escritora. «Rosalía tivo un vínculo moi estreito con esta vila, pasou aquí varios veráns e crese que foi onde naceu a célebre frase ‘Abride as fiestras que quero ver o mar’», destacou Outón.
O alcalde, Alberto Varela, resaltou que «a escritora plasmou o seu amor por esta terra na súa obra e, por iso, queremos renderlle tributo». O formato da representación favorece a súa mobilidade, cunha posta en escena sinxela e de curta duración.
As funcións iniciaranse o venres ás 17.00 no centro cultural de Bamio, continuando por O Gato Negro, Trabanca Sardiñeira e Guillán. O sábado, ás 12.30 a representación levarase a cabo na Biblioteca Rosalía de Castro e pola tarde en Faxilde, Vilaxoán, Sobradelo e Trabanca Badiña. O domingo 23, aniversario da escritora, as funcións comezarán ás 12.00 no centro cultural de Solobeira e seguirán ás 13.00 en Rubiáns, finalizando pola tarde nos Borrizos de Cornazo, A Laxe, o centro cultural Grupo de San Roque e o de Breogán no barrio do Piñeiriño.