Jéssica Bouzas revalida o título de Mellor Deportista de Vilagarcía

La Voz VILAGARCÍA / LA VOZ

AROUSA

A gala deste ano será recordada pola forza dos aplausos a todos os recoñecidos

28 mar 2025 . Actualizado a las 23:22 h.

As apostas apuntaban ao seu nome, e á conclusión da XXXII Gala do Deporte as poucas dúbidas que puideran quedar sobre a elección de Jéssica Bouzas Maneiro coma Mellor Deportista de Vilagarcía 2024 quedou disipada. Un recoñecemento que recolleu o seu pai, por atoparse ela en Turquía tentando revalidar o seu primeiro e ata o momento único título de categoría WTA, o Megasary Hotels Open. Un éxito este que figura na ampla e poderosa folla de servizos que Jéssica atesourou o ano pasado, desde a súa estrea nunha lista da Billie Jean King Cup co equipo nacional español de tenis, ata a súa sobresaínte actuación nos cadros principais de Wimbledon e do US Open, derrotando a varias primeiras espadas, e o seu salto e consolidación no Top 100 da elite mundial.

Coma finalistas quedaron Óscar Marcos, xogador do Celta Fortuna de Primera Federación e internacional español sub-19, que vén de colaborar na clasificación do conxunto nacional para a vindeira Eurocopa da súa categoría, José Fontán, futbolista do FC Arouca da Primeira División de Portugal e protagonista a temporada pasada no Cartaxena CF de Segunda División, Yago Vicente, campión de España de 100 metros combinados de salvamento; e Paula Suárez, finalista no Campionato Europeo e no Mundial de Xadrez Xuvenil nun ano, o pasado, no que se converteu en Mestra FIDE. Só os dous últimos puideron asistir á gala, co resto representados por cadanseu familiar.

Antes dos aplausos pechados aos cinco finalistas, a Gala do Deporte deste ano converteuse nunha sorte de festival de mostras de cariño e ata ovacións do público presente no Salón García cara todas e cada unha das persoas que foron desfilando polo seu escenario para recoller algún premio ou recoñecemento. Unha lista na que sobresaíron os discursos emotivos da filla de Antolín Diéguez, durante moitos anos directivo do Cortegada, que recolleu a mención ao seu pai a título póstumo louvando a figura dos proxenitores que levan os seus fillos a practicar calquera deporte; ou a da adestradora da Agrupación Atlética Mazí, Verónica Cores, cunha mención na categoría de técnica deportiva, que lanzou un discurso a prol da maternidade no deporte, reclamando maior comprensión e apoio desde as autoridades deportivas para facilitar que persoas coma ela poidan compaxinar a súa condición de nai levando os seus fillos cando participan en competicións. Pero foi sen dúbida Javi Guerrero, delegado do Basket Base Club e membro da asociación ACD Encestarías, o que gañou o partido das ovacións, ata o punto de verse moi emocionado polo cariño que lle transmitiu o aforo do Salón García.

Carolina Baños, no Atlético Arousana, e Jordi Aragonés, na selección absoluta feminina de baloncesto, recibiron a mención á traxectoria deportiva, Aragonés, cunha mensaxe de agradecemento gravada en Cracovia, onde vive e traballa. Gonzalo Salgado, fotoxornalista do Diario de Arousa, subiu ao escenario para recoller a mención a Medios de Comunicación. Giraldo, na categoría de empresas, a Federación Galega de Deporte Adaptado, a Federación Galega de Vela e o Salvamento Vilagarcía completaron os recoñecementos.