Arousa tirou da música, dos libros, das flores e das dornas para conmemorar o 17 de maio
18 may 2023 . Actualizado a las 05:00 h.Arousa volveu cumprir coa festa das Letras Galegas. De norte a sur da comarca prodigáronse os actos lúdicos e culturais organizados co gallo do 17 de maio. Ás 10.30 horas xa andaban as gaitas de Boudebou, Volandeira e Con de Xido dando a alborada por Cambados para chegar ao mediodía con unha cita ineludible na axenda de onte na vila do albarño: a ofrenda floral ante a escultura de Ramón Cabanillas na Calzada. A música continuou soando a poucos metros de alí, no parque de Torrado, desta vota da man da Banda de Música de Castrelo.
Pola mañá soou tamén a música tradicional en Carril. Actuaron a escola do Gato Negro e o grupo de Malveiras e seguiulles De Vacas para ofrecer a seu particular repertorio salpicado de humor. No faltou a tradicional ofrenda floral ante o busto de Rosalía de Castro.
O Grove tamén celebrou por todo o alto o Día das Letras con música, un contacontos e a Feira do Libro Galego, que contou cun apartado dedicado en exclusiva ao autor homenaxeado este ano, Fernández del Riego. Á noitiña, a actividade pasou da rúa Hospital ao auditorio para a proxección da película As Bestas.
Noutro auditorio, no de Ribadumia, celebraron a Gala Ribadumienses do ano a prol do galego, coa actuación estelar de Luar na Lubre, mentres que en Meis levaron a festa á finca da Casa de Parga.
Á beira do mar, na Illa, celebraron a clásica xornada de navegación tradicional, aínda que desta volta os músicos de Dorna tiveron que cambiar o peirao do Cantiño pola praza do Regueiro, por aquilo de evitar o pago das taxas a Portos. Non foron os únicos que despregaron onte as velas. En Cambados fixérono tamén coa botadura da dorna A Última.