O proxecto concebiuse coma un obradiro educativo e unha obra colectiva
29 mar 2025 . Actualizado a las 05:00 h.A Galería Besada, de O Grove, acolle estes días unha mostra realizada polo alumnado dos centros IES Monte da Vila e As Bizocas promovido polo Centro de Información á Muller do Concello do Grove. O proxecto, que leva por nome Tecendo Identidades Colectivas, foi deseñado como un obradoiro de educación artística que consistía na creación dunha obra colectiva partindo de sensibilidades individuais, e co obxectivo de promover a igualdade de xénero, e afondar no concepto de identidade.
Deste xeito foron creando pezas individuais sobre un anaco de tea branca, con distintas mensaxes, que máis tarde uniron confeccionando unha capa que representase a toda a comunidade, reivindicando deste xeito a arte téxtil. A capa representa, din, o sentirse arroupados, «coa necesidade de coidarnos uns a outros», e foi escollida por ser unha prenda unisex, independente ás características físicas e socioeconómicas dos individuos.
Esas intervencións dan fe da creatividade do alumnado meco, que neste caso foi dirixido por Menchu Outón, Clara Vindel e Raquel de Ana, e en cuxa produción colaborou tamén o departamento de Igualdade da Xunta de Galicia. A mostra finalizará o 11 de abril, aínda que existe a posibilidade de que se estenda ata pasar a Semana Santa.