Preto de 200 deportistas celebrarán os 30 anos dos Xogos Minoritarios Special Olympics en Vilagarcía
VILAGARCÍA DE AROUSA
Fexdega albergará o sábado a cita, que fomenta a convivencia e a visibilidade de persoas con discapacidade intelectual
05 mar 2025 . Actualizado a las 22:45 h.Vilagarcía de Arousa leva anos gañándose a conciencia a condición de capital deportiva galega de persoas con discapacidade. Este sábado, no recinto feiral de Fexdega, sumará un argumento máis, acollendo a trixésima edición dos Xogos Minoritarios Special Olympics para deportistas con discapacidade intelectual, organizados pola asociación de pais e de nais do mesmo nome e polo Concello de Vilagarcía.
A casa deste último serviu este mércores de escenario da presentación dun evento que reunirá a preto de 200 competidores dunha ducia de entidades de toda a comunidade galega. Entre elas, en calidade de anfitrioa, a vilagarciá Con Eles, que participará con dúas decenas de atletas, encargados de ler o manifesto Quero gañar, máis se non o acado deixádeme ser valente no intento, acompañados de dous adestradores. As asociacións San Francisco de Vigo e CAPD Redondela completan a representación da provincia de Pontevedra.
O programa deportivo arrincará o sábado ás doce da mañá. Faráo con catorce disciplinas en acción. Con probas individuais, como o tenis de mesa ou o bádminton, e de grupo, desde tiro á portaría, equilibrio dinámico ou lanzamento a canastra. Tamén haberá espazo para a novidade, con catro modalidades de nova inclusión: desprazamento, tiro a portaría con stick, recepción e pase de pelota, e tiro de precisión.
«Para nós o deporte non é unha competición, senón unha experiencia de convivencia, de rehabilitación e de estimulación, que presta apoio a quen máis o necesita», comentou na presentación Eladio Fernández, presidente de Special Olympics. Principios que alimentan a elección do premio ás boas prácticas no deporte, destinado a enxalzar o comportamento daquela entidade que destaque pola súa deportividade e respecto ás normas e aos resto dos equipos, decidido polo voto de cada asociación participante e que será entregado o propio sábado arredor das seis da tarde na cerimonia de clausura dos Xogos.
A presentación do evento contou co alcalde e co concelleiro de Deportes de Vilagarcía, Alberto Varela e Carlos Coira. O primeiro loou os deportistas que acudirán a Vilagarcía: «Son un exemplo de competición sa, demostrando que vencer non é o máis importante, senón todo o que se aprende a través do deporte».