O premio xornalístico Reimóndez Portela é un prestixioso galardón que se outorga «ao mellor traballo ou serie de traballos, publicados en lingua galega, en calquera dos medios de comunicación», tal e como reza o portal da cultura de Galicia. Persoeiros de renome como Xosé Neira Vilas, Xosé María Lema Suárez, Miguel Anxo Fernán Vello, Pedro Rielo ou Francisco Castro foron algúns dos agasallados en anteriores edicións. Pouco pensaba eu que neste ano 2023 o galardoado co Reimóndez Portela ía ser eu, que non son xornalista de formación, por un traballo divulgativo sobre un espazo rexenerado no Concello da Estrada.
Foi, precisamente, o Día Mundial do Urbanismo 2023 cando me chegou a nova, na que o xurado do premio, por unanimidade valora «a actualidade e vixencia na temática e o esforzo do autor por facer comprensible para un público non especializado o alcance e significado da intervención».
Valoran nomeadamente a detallada explicación que fago, con palabras comprensibles para a cidadanía, dunha boa intervención urbanística que beneficia substancialmente a vida dos cidadáns. É un exercicio que debía ser máis cotiá e estendido, para fortalecer a participación do pobo nas decisións urbanísticas, un acto de transparencia para garantir o apego e a vinculación da xente coa súa contorna.
Moitas veces, os arquitectos deseñan espazos urbanos sen explicalos á xente que os vai vivir, sen ningún tipo de empatía social e complicidade. Moitas veces, quen fala destas obras son xornalistas que non chegan a conectar co pobo. Algo que cómpre mudar neste novo tempo.