O oitavo recompilatorio de A Voz de Barbantia xa está á venda nas librarías
16 dic 2025 . Actualizado a las 05:00 h.Xa está na rúa unha das xoias literarias da alianza que manteñen La Voz de Galicia e a asociación Barbantia: o oitavo recompilatorio do suplemento A voz de Barbantia. Trátase dun volume que recolle do número 176 ao 200 do caderno que ve a luz de forma mensual nas páxinas centrais da edición comarcal do xornal, integrado por unha ducia de seccións elaboradas por colaboradores alleos á redacción e vinculados na súa meirande parte ao mundo da cultura.
Son, en total, un cento de páxinas dedicadas á historia, á literatura, á arte e á paisaxe, con espazos abertos á participación de todos os veciños. O volume foi presentado o sábado en Porto do Son, nunha gala que tivo como eixo a entrega dos Premios da Cultura de Barbantia, os prezados Sereos, pero pode conseguirse no puntos de venda habituais de La Voz de Galicia.
Como sempre, a cuberta presenta aos 25 protagonistas entrevistados por recoñecidas plumas de Barbanza, mentres que nas primeiras páxinas expoñen os obxectivos da publicación dous dos seus coordinadores, Moncho Ares, delegado de la Voz de Galicia en Barbanza, e Manuel Cartea, directivo de Barbantia. Os dous inciden en resaltar un futuro alentador, pois o noveno recompilatorio está en marcha.
«É a suma dos esforzos de moita xente e de moitos puntos de vista»
Manuel Cartea é un dos coordinadores do suplemento A Voz de Barbantia e, polo tanto, do recompilatorio. Non dubida en resaltar a importancia que a publicación ten: «É a suma dos esforzos de moita xente e de moitos puntos de vista sobre a realidade de Barbanza». Engade que é para el unha inmensa satisfacción ver na rúa este volume: «Como digo sempre, o orgullo non é chegar, senón manterse, polo que este oitavo recompilatorio é un éxito rotundo».
Mirando cara a publicación, Manuel Cartea destaca todas as colaboración que integra, achegas de máis dun cento de persoas que lle deron forma a artigos de ciencias, literatura, historia, arte... «Un universo literario que non ten parangón no eido das letras a nivel galego», conclúe. Unha xoia imprescindible en calquera biblioteca, tanto pública como privada.