Walter Pardo, PSOE de Malpica: «A moción da vergonza vailles pasar factura»

Walter Pardo (1978) arrancaba o mandato pasado como alcalde de Malpica e rematábao na oposición. Será a segunda vez que se presenta á eleccións polo PSOE.

—Como viu o desenvolvemento do mandato?

—Cando formamos o tripartito, o primeiro ano foi mirar o que hai no Concello, expedientes en trámite, a economía, como está o persoal e sobre todo aterrar e ir gobernando o barco que tes e saber a onde o podes levar. Veu unha pandemia, foi un desastre, non se sabía como gobernar, pero seguimos traballando ata que veu a moción, que é unha ferramenta política, moi válida, pero penso que debería de usarse para saber se un goberno está a cometer unha ilegalidade ou se está a facer algo moi grave. A nós, a que nos fixeron, ademais de ser un texto descargado de internet, estaba en castelán, foi por cuestións partidistas e persoais dos que a fixeron. Dixeron que era por inacción do goberno, pero iso teno que xulgar o pobo cada catro anos.

—Que posibilidades de pacto existen agora?

—Teño moi claro, clarísimo. Eu son de sangue. Meu avó paterno é de Leiloio e miña avoa materna é Carme de Corme. Ningún sigue con nós, pero o que me coñece e os coñeceron sabe o que hai. Con iso digo todo.

—O obxectivo cal é?

—Retomar a alcaldía, porque está claro que o Concello de Malpica no convivir está totalmente desorganizado, gastado. Os veciños tanto do casco urbano como das parroquias estano vendo. Este goberno ten concelleiros que cada un fai o que quere, uns polos outros e está a casa sen varrer e a moción da vergonza vailles pasar factura. O noso obxectivo é acadar a alcaldía, pero fortes, porque Malpica merece máis. Temos que ser valentes, o voto é secreto e temos que cambiar o rumbo a este concello. A única proposta válida e alternativa para o futuro de Malpica é o equipo que teño a sorte de encabezar.

—Como pode repercutir que haxa cinco partidos?

—Non sei. En teoría Vox tería que collerlle votos ao PP, o que lles influiría de xeito negativo, pero quen me dera ser futurólogo.

—Cómo valora o feito?

—Cando estivemos no goberno fixemos sempre propostas aos nosos socios para mellorar a calidade de vida dos veciños. Quedou o plan director do saneamento feito, unha auditoría enerxética totalmente feita, iniciativas en patrimonio, como a da croa do castro, mellora a contorna do río de Va e outras cousas que eran necesarias, pero quedaron moitas pendentes cando nos botaron fóra. Fixemos unha oposición construtiva como fixemos un goberno construtivo.

—Que levan no programa?

—Moitas das cousas que xa estaban hai catro anos porque cortáronnos o traballo pola metade. Imos continuar.

---

---

---