É máis de Reis, de Papá Noel do Apalpador..? De todo. Encántanme os regalos.
Que lle pide ao 2024? Que non se leve a ninguén máis.
Gústalle máis a árbore, o nacemento, ambos, nada..? De árbore e nacemento. Gústame iso, e as luces.
De turrón ou non? De selo, brando ou duro? Era do duro, e agora son do brando.
Ceas con desfase en fin de ano, ou máis íntimas e en familia? Prefiro na casa. Na propia, ou de amigos, antes ca restaurante.
Son días de comidas excesivas, ou de moderación gastronómica? Eu de moderación sei pouco neste tema.
É de comer as 12 uvas, ou pasa desta tradición? Cómoas, pero cada vez que o fago penso que por que non virían oito, ou sete. Por que tantas? Son moitísimas! A min, dende a oitava, cústame.
É esta unha época na que sempre tivo moitos regalos? Si que os había, pero non moitos. Para todos, pero non a mansalva.
O Nadal é máis motivo de ledicia ou de melancolía? Era de moita ledicia, e síntoas cada vez máis coa mestura da ledicia e a melancolía. Si que vai a máis ese compoñente melancólico.
Vostede declarouse moi a favor de escribir cartas. Ségueo facendo? Faime moitísima ilusión cada vez que á casa chega algunha postal. Gústame moito, e se non o fago é por falta de tempo. Encantaríame retomalo. Sigo sendo das que escriben en bolígrafo e papel, das que estudan en físico. Os meus compañeiros usan máis as tablets, eu necesito guión físico. Un pouco anticuada nese sentido, pero encántame escribir. Por tempo escribo menos do que me gustaría.