Francisco Peña presentou a súa obra en Carballo, coa compaña do rexedor, Evencio Ferrero
25 ene 2025 . Actualizado a las 19:04 h.O venres, en tarde de choiva e temporal e durante case dúas horas, o científico, académico e escritor Francisco Peña expuxo aos asistentes ao auditorio da biblioteca Rego da Balsa o contido do seu libro Rumbo a la salud ambiental planetaria y a un mundo nuevo. Estivo acompañado polo alcalde carballés, Evencio Ferrero, encargado de presentalo. Na publicación, dada a coñecer xa anteriormente en Madrid, Ordes, O Grove, Ponteareas, Parada de Sil ou Ourense, o autor explora as principais ameazas que enfronta o mundo, e propón tamén algunhas solucións de cara a un futuro máis sostible. Unha publicación que convida a «reflexionar, actuar e soñar», e que incorpora ademais catro capítulos referentes á comarca.
Foron estes días intensos en Carballo, con intervencións tan sinaladas e inspiradoras como a da deportista Teresa Portela ou a de Ángel Carracedo. Onte mesmo, ademais, o Fórum acollía unha xornada sobre patios inclusivos promovida pola agrupación Un Paso Máis. Mañá e tarde de actividades das que extraerán conclusións nas vindeiras horas.