Axenda diaria | A banda, con talento carballés nas súas filas, presenta hoxe o seu novo disco na Capitol
13 mar 2025 . Actualizado a las 05:00 h.Xoves 13 de marzo e estas propostas para a xornada dende a Costa da Morte ou a ela vinculadas:
Santiago • Con talento carballés nas súas filas, tal é o caso de Hadrián Garcia, a banda De Ninghures ten prevista para hoxe a festa de presentación do seu novo disco, Feira. Será a partir das 21.30 horas, na Sala Capitol, e todas as entradas están xa esgotadas. Aquí, Corazón Alionado, O último baile, Poço, Descolorido, Morena, Feira, A Burriña, Punteada e En fin, que máis dá son os temas deste novo traballo, para cuxa estrea en vivo De Ninghures terá convidados de excepción: Fillas de Cassandra, Juan de Dios, Ortiga, De Vacas e tamén Anxo Pintos.
Vimianzo • A Casa da Cultura acolle ás 11.00 a presentación do programa que se fará polo 30.º aniversario da iniciativa Ponte... nas Ondas, e no que se participará dende esta localidade. Ademais de rexedora e concelleira, acudirán hoxe a Soneira o director do CFR de A Coruña, Emilio Veiga; ou o presidente da asociación Ponte... nas Ondas, Santiago Veloso.
A Laracha • A Casa da Cultura larachesa acollerá de 17.30 a 19.00 horas o obradoiro Benestar emocional en familia, impartido por Quérote+ e dirixido a familias con menores de calquera idade. A idea é crear un espazo de reflexión para contribuír de xeito positivo ao desenvolvemento dos fillos, xerando un ambiente de harmonía nos fogares. Os interesados en acudir han de inscribirse previamente no 981 612 811 ou no Edificio Administrativo.