Será tamén o 5 de decembro cando se acendan as luces e comece unha intensa programación
28 nov 2025 . Actualizado a las 18:35 h.Ensino, Cultura e Deportes, Servizos Sociais e Promoción Económica son as áreas implicadas na programación de Nadal da Laracha, dada a coñecer este venres. Todas elas estiveron representadas na posta de longo dun ciclo de iniciativas do que o alcalde, José Manuel López Varela, convidou a gozar a todos os veciños. Foi el quen desvelou cando abrirá o poboado de Nadal —prazas Les Sables e O Recreo— que xa se agarda nos últimos anos e tamén cando se acenderán as luces desta tempada 2025/2026: como en Carballo, en Cee ou en Vimianzo, será o vindeiro venres 5 de decembro (18.30), mesma xornada na que botará a andar a campaña Agasalla comercio local, ten premio, un asunto sobre o que interveu a edila do ramo, Rocío López.
A campaña comercial repartirá este ano premios «por valor de 15.000 euros», ao que hai que sumar medio cento de regalos doados polo propio comercio. Son case 40 os establecementos que se adheriron á iniciativa, e a todos eles se lles deu as grazas. Serán estes os que repartan as tarxetas rasca-gana, sistema que se xa vén empregando nos últimos anos e con boa acollida: «Convidamos a todos os veciños a facer as súas compras de Nadal nos comercios do noso municipio, podendo así ser agraciados. Ampliamos a campaña nesta ocasión ata o 5 de xaneiro», avanzou Rocío López, quen tamén incidiu nas oportunidades de conciliación a través do Programa Harmoniza: Conciliando na Laracha: «Xa está aberta a inscrición [ata o 14], poden pasar por Servizos Sociais».
Máis alá da xornada do 5 de decembro, destacada polo rexedor, a concelleira de Cultura, Patricia Bello, indicou que a programación comezará con actividades dirixidas aos colexios. Non faltará tampouco teatro na Casa da Cultura, nin outras actividades para os máis pequenos durante as vacacións, nos tres cascos urbanos (A Laracha, Paiosaco e Caión). A iso hai que sumar a visita de Papá Noel, a cabalgata de Reis —que volverá ser dous días, 4 e 5 de xaneiro, para percorrer todas as parroquias— ou os concursos, que son catro: postais, para os colexios; escaparates; fachadas e tamén panxoliñas (domingo 20).
AO DETALLE
- Obradoiro de cociña Panettones con maxia, con sesións para Educación Infantil e Primaria os días 22 e 29 de decembro. A inscrición será gratuíta e poderá formalizarse desde o 15 de decembro.
- Peque Disco Moc Moc, espectáculo de MeRe Clown o martes 23 de decembro no Centro Sociocultural Paiosaco.
- Visita de Papá Noel á Praza O Recreo o 23 de decembro en horario de mañá e tarde.
- Teatro familiar: Os contos do Lobicán, de Redrum Teatro, o venres 26 na Casa da Cultura.
- Patinaxe sobre xeo para mocidade de 12 a 18 anos o luns 29 de decembro, con saída desde a praza Les Sables d’Olonne cara á pista da República (Perillo).
- Espectáculo musical: Melodías en familia, de The Music Patrol, o martes 30 no Centro Sociocomunitario de Caión.
- Gala de maxia: Abraio, de Dani García, o venres 2 de xaneiro na Casa da Cultura.
- Contacontos para bebés: Cu-cú, tas-tás, de Barriga Verde, o sábado 3 de xaneiro no Baixo da Biblioteca.
- Cabalgata dos Reis Magos, os días 4 e 5 de xaneiro, percorrendo as trece parroquias do municipio.