Ten 14 anos e estuda terceiro de ESO no Manuela Rial Mouzo de Cee, a onde leva acudindo dende que tiña só tres. É a gañadora do primeiro premio do certame Contos de Primavera de La Voz e Radio Voz
10 may 2017 . Actualizado a las 05:00 h.Jesús Sánchez, profesor de Lucía Varela, gañadora do primeiro premio do certame Contos de Primavera de La Voz e Radio Voz, cre que, como lle dicía a el Darío Villanueva, a literatura ha de ter a capacidade de conmover, máis alá da vontade estilística. Cre que por aí foron os tiros de Lucía, quen ademais no seu conto apela ao mundo pasado, e de Jorge García Pombo, tamén alumno do centro Manuela Rial Mouzo, que obtivo o segundo premio. Lucía ten 14 anos, unha irmá pequena, estuda terceiro de ESO e vive en Figueiras de Abaixo (Muxía). Presentou ao certame un conto titulado Unha boa viaxe, escrito na memoria de seu bisavó, Carmelo. Xa onte pola mañá se recoñecía «moi contenta» en Radio Voz, onde sinalou que é a primeira vez que recibe un galardón deste tipo: «O relato era para presentar o 20 de abril na clase e o 19 dese mesmo mes morreu meu bisavó. Entón decidín escribir esta historia por el e para honralo, pola vida que nos deu. Quíxeno facer para el».
Pola tarde, xa de volta en Muxía, logo da xornada escolar, estaba igualmente entusiasmada, tamén coa gala de entrega de premios do sábado, no Casino de Carballo, á que ela tiña previsto acudir coa súa mellor amiga e con súa nai: «Iso é o que eu pensaba, pero agora acaban de dicirme que irán tamén os avós... ¡Iremos todos, creo!», contaba onte. A nai recoñécese «orgullosísima», non xa polo premio, senón tamén pola historia que elixiu contar Lucía. A autora di que non lle importaría nada ler este conto en público.
-¿O bisavó chamábase realmente Carmelo? ¿Contáballe historias?
-Si, si que se chamaba así meu bisavó [tiña 85 anos]. Cando nos reuniamos, adoitabamos contar historias do que el pasou na súa vida.
-Aínda que cando un se presenta a un certame ten opcións de ganar, ¿chegou a plantexarse acadar o primeiro premio?
-Non, para nada, era o último que me plantexaba. A min gústame escribir, pero sobre todo aínda me gusta moito máis ler.
-¿Que tipo de lecturas?
-Novelas...
-¿De aventuras?
-De amor.
-¿E xa ten algo en mente de cara a futuros estudos?
-Gustaríame estudar turismo, na Coruña [recoñece que Muxía ten moito potencial neste sentido]. E tamén me gustaría escribir un libro, faríame moita ilusión. Ademais, de cara ao verán, temos plantexado ir colaborar cunha asociación, APEM. Ese é o plan así máis inmediato que temos.
-No colexio, ¿é de letras?
-Son de matemáticas total [ri].
-¿Animarase a escribir máis?
-Pode que si...
-¿E o libro? ¿Xa ten tema?
-Si... de amor.
-Parece que a súa bisavoa se emocionou co conto que escribiu.
-Si, chorou cando o lemos na casa e chorou tamén cando se soubo que ganara o primeiro premio con el. O que conto na historia é real.