Corcubión inicia nova viaxe ao Medievo

Hoxe • Salvo que a historia se vire do dereito para o revés, case todo o mundo sabe o desenlace. Iso, non obstante, non lle resta ápice de atractivo á Recreación do Desembarco das tropas do arcebispo Rodrigo de Luna en Corcubión, acaecido no 1457. Será esta noite, na Praia do Recheo, ás 22.30, o prato forte dun Mercado Medieval de tres días, dende hoxe ao domingo: «É o que nos dá ese carácter único e singular», dicía onte Jan Lamas dende a asociación Cantigas de Dona Xoana, organizadora. «Estamos a tope, cos últimos preparativos, case metidos en pleno medievo», contaba tamén. Máis dun cento de persoas participarán na teatralización do Desembarco, que este ano se levará tamén aos días posteriores: «Enterro dos caídos, paseos polo mercado de Dona Xoana e familia... tamén para que os nosos nenos saiban máis da nosa historia».

Malia que a representación —que como cada ano conta co apoio da Deputación, nesta ocasión 14.423 euros— será ás 22.30, xa dende pola mañá, co izado do pendón ás 11.00 e apertura do mercado ás 12.00, haberá moito para facer en Corcubión. Espectáculos cada media hora ou menos e nomes ligados xa á historia desta festa que vai pola 23.ª edición, como Acibreira, Gaeloc ou o Fauno Antón: «É un espectáculo ver os seus brincos». Lamas lembra «unha oferta ampla e para todas as idades». Haberá zona infantil mañá e tarde —tamén con opción inclusiva, sen ruídos nin animación—, artesanía, gastronomía, teatro... Ir, ver e gozar.

---

---

---