Juan García Pose, PP de Coristanco: «O importante foi recuperar a normalidade institucional»

Juan Carlos García Pose é da parroquia de Oca e ten 51 anos. É técnico agrario e empresario. O actual alcalde preséntase por segunda vez polo PP.

—Hai catro anos eran oito partidos, e agora son catro. Que lle parece?

—Tan democrático é que se presenten catro como oito. Hai catro alternativas, iso é bo en democracia.

—Vostede gobernou este mandato en minoría. Como foi a experiencia?

—Coa minoría un saca o mellor e si, a máxima xenerosidade para alcanzar acordos, para sacar as cousas adiante. E, de todas as alternativas, é a máis complexa, a que máis traballo dá, na que máis pontes hai que tender. Nós tiñamos claro que Coristanco necesitaba marcar un antes e un despois, un punto de inflexión. No 2019, ese esforzo tróuxonos ata o punto no que estamos hoxe. Sentímonos orgullosos: os temas hai que tratalos, debatelos moito. E pódense facer cousas. A clave é a xenerosidade de todas as partes.

—Vostede quererá aumentar a representatividade.

—Traballouse intensamente, está bastante estendido que se fixeron moitas cousas. Coristanco está nunha situación radicalmente diferente ao mandato anterior, no que había líos, noticias negativas... O balance é positivo, e gustaríanos que os veciños valorasen ese traballo. Presentámonos para ter a máxima confianza posible e mellorar o resultado. Agora xa nos coñecen, con datos que avalan a xestión. E ademais, votos que foron a outras candidaturas que non hai teñen que buscar acomodo nas que imos.

—Que destaca do feito en Coristanco?

—Para min o máis importante foi recuperar a normalidade institucional. Os anos anteriores ao 2019 deterioraron moito a imaxe. E cando iso ocorre, a xente non quere emprender nin vivir aí. E agora mesmo o que se proxecta é algo diferente. Recuperamos a normalidade, e un pouco o respecto institucional que se lle ten hoxe. Somos quen de formalizar convenios, reivindicar proxectos para tomalos en serio, e os datos de contratación avalan que os resultados son bos.

—Que espera ver rematado no vindeiro mandato que non puido ser neste?

—Teño a satisfacción de ter resolto por completo o tema do abastecemento, cunha folla de ruta clara para os próximos meses. E tamén a área empresarial, que marcará unha mellora e consolidación do Concello nos vindeiros anos. Ademais, Coristanco ten que ter un auditorio para nenos, maiores... cunha oferta cultural complementaria. Temos un acordo cunha familia para mercar a parcela, céntrica, e estamos definindo o proxecto. Gustaríame que tivese avanzado máis, pero son temas que levan o seu tempo. Grandes asuntos como a educación, a posta polas catro unitarias, as casas do maior, ter resolto o saneamento, ter colaborado coas redes veciñais, máis de cinco millóns en máis, zonas verdes melloradas... Fíxose moito, e farase máis.

---

---

---