Eduardo Parga, PP de Malpica: «O goberno anterior a nós estaba paralizado»

Eduardo Parga (Seaia, 1966) é alcalde de Malpica dende o 2012, coa excepción do actual mandato, cando recuperou o cargo tras unha moción de censura. Pasou por maioría absoluta e goberno de coalición. Encaza o PP: 

—Que tal vai a campaña?

—Encamiñada. Xa estamos no ecuador.

—Dun tripartito a un bipartito. Que tal a relación co socio, Alfredo Cañizo?

—Estes case 19 meses foi unha relación boa, de bo entendemento para poder facer cousas por Malpica.

—E houbo unha moción de censura.

—Antes houbo un goberno tripartito, que foi feito só para sacar ao PP do goberno, sen consenso nin programa, e aos feitos me remito. Nun principio, o BNG nin estaba no goberno, só apoiaron ao PSOE, e dende ai, varios meses para chegar a un entendemento para estar no goberno. E como foi feito para sacar ao PP, non houbo entendemento dende o principio, e sempre estiveron con disputas, non polo ben do Concello. Chegou o momento que nos propuxeron volver, que había unha posibilidade se queriamos volver ao goberno. Despois de pensalo moito tempo, e vendo que era necesario para que Malpica medrara, porque estaba totalmente parada, pois decidimos dar o paso.

—Desta vez son cinco os partidos. Como pode influír que sexa un máis?

—Se cadra pode fragmentar máis o voto. Á larga é prexudicial para Malpica. Esperemos que os veciños elixan votar aquelas forzas que teñen opcións de goberno polo ben de todos.

—A súa aspiración será unha maioría suficiente. Pero, chegado o momento, estaría abertos a pactos?

—Se o pobo di que non hai unha maioría suficiente (nós esperamos que sexa o PP) para gobernar este Concello, terá que facelo alguén. Se non hai unhas maiorías, haberá que chegar a acordos, iso é indubidable. Pero é prexudicial que se fragmente tanto o voto, porque á larga, Malpica perde.

—Como ve a primeira parte do mandato?

—A primeira, paralizou todo o Concello. Nós deixáramos obras importantes para poder executar e houbo problemas, como estar a punto de perdelas, como o centro de día, tivemos que recuperalo e intervir eu dende a oposición. Ou a urbanización da rúa principal, que a pararon ata tres veces, a Xunta tiña pensado indemnizar á empresa e que parase. Houbo que falar con eles para que seguise, xa que era moi importante. E máis obras que non se executaron por falta de seguimento. O goberno estaba paralizado.

—E na segunda?

—Foron poucos meses. Fixemos o centro de día, rematámolo, só falta o papelexo. Fixemos investimentos moi grandes en vías, que eran necesarias, polo desgaste de dous anos sen mirar para elas. En Cultura démoslle axudas a todas as entidades, e en Deportes, o mesmo. Estamos co alumeado público, case dous millóns de euros. Moito, e a seguir facendo, como un viveiro de empresas.

---

---

---