Faise un chamamento para que este 20 de decembro se interprete a peza nos patios de colexios e institutos
20 dic 2023 . Actualizado a las 05:00 h.Hoxe • É o Himno a base fundamental dos símbolos da comunidade galega. Foi o 20 de decembro de 1907 cando se estreou no Centro Galego da Habana, en Cuba, sendo logo, por decenios, peza identificadora da cultura galega no mundo da emigración, pero tamén en actos públicos celebrados en Galicia. Non obstante, o poema que máis tarde levaría o título de Os pinos, de Eduardo Pondal, musicado por Pascual Veiga, non sería adoptado oficialmente como himno ata despos da aprobación do Estatuto de Autonomía de Galicia, no ano 1981. Daquel 20 de decembro en Cuba pasaron 116 anos. Hoxe, tamén 20 de decembro, é por tanto Día do Himno, e a fundación pondaliana non quixo deixar pasar a efeméride sen festexar.
Interpretación nos patios
A entidade, con sede no Couto, en Ponteceso, impulsa para este mércores unha convocatoria xeral coa que pretende que, no patio de todos os colexios e institutos da Costa da Morte, mais tamén de Galicia en xeral, se interprete esta peza de identidade que, segundo trasladan, «vén a resumir o enxeño literario do noso poeta». Tamén dentro desta conmemoración deseñou a fundación unha xornada de convivencia na que participarán alumnos do colexio Eduardo Pondal e do CEIP As Forcadas de Corme, ambos no municipio, con estudantes chegados dende o concello de Mondoñedo, lugar de orixe de Pascual Veiga (1842-1906). Os pequenos de Corme serán recollidos en torno ás 11.45 e os do Eduardo Pondal sobre as 12.15, para logo dirixirse xuntos á Praza do Recheo, donde tomarán parte nunha ofrenda floral diante do monólito dedicado ao bardo (1835-1917).
percebeiros e redeiras
Guiados polos alumnos dos colexios locais, os visitantes percorrerán parte da costa do municipio. Achegaranse ao porto e tamén ata O Roncudo, dondo varios percebeiros lles falarán dunha das actividades máis singulares e específicas da Costa da Morte, un oficio do que se está a procurar o seu recoñecemento como Patrimonio da Humanidade. Tamén as redeiras amosarán aos pequenos os seus quefaceres. A velada de conmemoración do Día do Himno rematerá despois cun xantar en comunidade no CEIP As Forcadas cormelán, do que sairán ás 14.45.