La actriz representa en Vigo Rosa esta fin de semana «Rosa de dous aromas»
16 abr 2011 . Actualizado a las 06:00 h.Isabel Blanco anda de xira estes días coa segunda montaxe teatral na que participa. Esta fin de semana representa en Vigo Rosa de dous aromas, un texto de Emilio Carballido, adaptado e dirixido por Lino Braxe. Nesta obra para dúas actrices, Blanco está acompañada por Sabela Hermida.
-O texto é máis coñecido fóra de Galicia que aquí. ¿Que lle viu á obra?
-Fascinoume cómo un home pode describir a alma feminina con tanta mestría. A través da psicoloxía das súas protagonistas vainos contando unha historia de dúas mulleres antagónicas nas que retrata o amor malentendido nunha sociedade machista. Pensei que nos ía divertir moito.
-Carballido era coñecido por utilizar unha linguaxe moi pegada á fala en México. ¿Como resolveron ao adaptar para o galego?
-A nós interesounos a universalidade da historia e do seu humor, pero precisábamos que a idiosincrasia galega aflorase a través do seu falar. Cada un no seu rexistro: Gabriela nun galego máis culto, e Marlén nun galego máis de «a pé». A comicidade mantense pola propia situación, polos diálogos, e por que non dicilo, pola compenetración máis alá do texto entre nolas dúas en escena, que é un elemento fundamental nesta obra. Garantir o divertimento do público, ese foi o noso obxectivo nesta montaxe e o noso director, Lino Braxe, estivo moi atento, mimando cada pequena peza deste engrenaxe, ata chegar ata aquí.
-As actrices adoitan queixarse de que hai poucos papeis escritos para elas.
-A queixa ten o seu porqué: As estatísticas demostran que a carreira dunha actriz é máis curta cá dun actor, por ridículo que isto soe. ¿Acaso agora o talento ten sexo? En fin, Peter Pan... Por sorte parece que a tendencia está cambiando... Polo menos en Hollywood tomaron boa nota disto. Están os exemplos de Helen Mirren, Judi Dench, Glenn Close, Sigourney Weaver ou Michelle Pfeiffer, son actrices que están recibindo traballo ultimamente. Algo está pasando. A nivel galego máis podería pasar, pero polo pronto alegreime da volta á escena de Dorotea Bárcena, a Quico Cadaval grazas.
-É coñecida máis pola tele ou polo cine. ¿Por que decidiu facer teatro?
-Estou namorada do cine, pero o teatro é un universo que quería experimentar... Comezar de cero é unha constante na miña vida. Foi da man de Pedro Rubin hai uns meses e agora atrevinme cun proxecto propio. Aprendendo sobre as táboas cuns compañeiros exemplares. De momento levo o L (risas), como os que empezan a conducir.
«Garantir o divertimento do público foi o noso obxectivo para esta montaxe»
isabel blanco actriz en «rosa de dous aromas»