La Voz presenta na Real Academia Galega o facsímile de «Queixumes dos pinos»
CULTURA
Para Xesús Alonso Montero, a publicación desta obra «é un acontecemento que en Galicia debería ser recibido con gaita e tamboril»
10 nov 2016 . Actualizado a las 10:46 h.La Voz de Galicia presenta hoxe na sede da Real Academia Galega o facsímile de Queixumes dos pinos, o emblemático poemario de Eduardo Pondal que este sábado fai o seu 130 aniversario. Foi o 12 de novembro de 1886 cando apareceu o libro na Biblioteca Gallega de Juan Fernández Latorre, fundador de La Voz, e Andrés Martínez Salazar, e agora, xusto 130 anos despois, o xornal ofrece a versión facsimilar aos seus lectores por 1,95 euros. A iniciativa conta coa colaboración da Fundación Eduardo Pondal de Ponteceso e co patrocinio de Gadis.
No acto de hoxe, previsto para as 12.00 horas, intervirá o presidente da Real Academia Galega, Xesús Alonso Montero, para quen a publicación desta obra «é un acontecemento que en Galicia debería ser recibido con gaita e tamboril». Na presentación tamén intervirán o delegado de La Voz en Carballo, Xosé Ameixeiras, e Lois García, presidente da Fundación Pondal. No mesmo acto Miguel Anxo Mato recitará o poema Campanas de Anllóns, e haberá música a cargo da clarinetista Blanca Represas, quen pechará o acto co Himno Galego, cuxa letra é precisamente de Pondal.
Centenario do autor
Queixumes dos pinos é un texto fundamental do Rexurdimento pero tamén no conxunto da literatura galega. No 2017 celébrase, ademais, o centenario da morte de Pondal. Segundo sinala Manuel Ferreiro, experto na súa obra, «que se recupere a edición orixinal en versión facsimilar é simbólico e moi importante neste momento porque para o ano que vén celebramos os cen anos da súa morte».