«Laxeiro e a arte da súa época», exposición estrela do programa do Marco no primeiro semestre do ano
CULTURA
O museo vigués organiza ademais unha exposición de Andrea Costas Lago, unha retrospectiva da cineasta francesa Yannick Bellon e unha mostra do pintor Lluís Lleó
10 ene 2023 . Actualizado a las 23:08 h.A exposición Laxeiro e a arte da súa época, que se poderá ver no Marco entre os próximos 23 febreiro e 21 xullo —nas salas frontais e do primeiro andar— e está comisariada por Miguel Fernández-Cid, é o proxecto estrela do programa para o primeiro semestre do ano do museo vigués, que se suma así á celebración acordada o pasado abril pola Real Academia Galega de Belas Artes, que decidiu dedicarlle o Día das Artes 2022 a José Otero Abeledo, Laxeiro (Donramiro, Lalín, 23 febreiro 1908-Vigo, 21 xullo 1996), nun ano para enxalzar a súa figura que remata o vindeiro 1 de abril. A proposta do Marco amosará unha selección das súas obras máis destacadas situándoas no contexto da arte da súa época, xunto a pezas doutros artistas que Laxeiro miraba con atención (Ignacio Zuloaga, Jesús Corredoyra, Arturo Souto, Manuel Colmeiro, Carlos Maside, Asorey, Maruja Mallo, Luis Seoane, Torres García), ou que facilitan un rico diálogo visual. Entre as devocións, Gutiérrez Solana, Vázquez Díaz, Benjamín Palencia e os máis tardíos Antonio Saura, Rafael Canogar e Washington Barcala. Como referencias especiais, artistas como Rembrandt e Goya, presentes con obra gráfica. Non se trata dunha mostra de peche, matiza o Marco, senón de debate, coa que se incide na necesidade de estudar a Laxeiro no contexto de seu tempo.
Ademais da do creador pontevedrés, o museo organiza unha exposición da artista e docente Andrea Costas Lago (Vigo, 1978), a retrospectiva da comprometida cineasta francesa Yannick Bellon (Biarritz, 1924-París, 2019) e a mostra individual do pintor Lluís Lleó (Barcelona, 1961).