A Fundación Otero Pedrayo concede o Premio Trasalba 2025 á Editorial Galaxia
CULTURA
Destaca «o papel que desenvolveu no renacer cultural e lingüístico de Galicia desde a súa creación en tempos difíciles ata o momento actual»
28 dic 2024 . Actualizado a las 18:25 h.O último domingo de xuño de 1976 Trasalba, no concello ourensán de Amoeiro, acollía a entrega do galardón que leva o nome do pobo onde está asentada a casa que foi de Ramón Otero Pedrayo. O primeiro dos premiados, naquela altura, foi Xaquín Lorenzo, Xocas, e nacía daquela a que segue a ser a festa anual da cultura galega.
Na que dende hai décadas é sede da Fundación Otero Pedrayo xuntáronse este venres os membros do padroado da mesma para celebrar a xuntanza anual referida á aprobación de actividades, contas e propostas para o vindeiro ano. Logo da mesma anunciouse que o Premio Trasalba 2025 será para a Editorial Galaxia.
A comisión xestora da fundación ourensá tomou o acordo de recoñecer «na Editorial Galaxia todo o que ela ten significado na promoción da cultura e da lingua galegas e o papel que desenvolveu no renacer cultural e lingüístico de Galicia desde a súa creación en tempos difíciles ata o momento actual». Tamén se lembrou, á hora de tomar a decisión, que o patriarca das letras galegas tivo unha estreita relación co proxecto, xa que el foi o primeiro presidente da mesma. «Cargo no que permaneceu desde 1950, ano da súa fundación, ata o seu pasamento en 1976», segundo se sinalou á hora de dar a coñecer a decisión.
Un vencello, o de Otero Pedrayo co proxecto da Editorial Galaxia, que foi máis alá, xa que «a simpatía que don Ramón sentiu pola empresa levouno a legarlle no seu testamento ‘a casa solar que herdou dos seus maiores, sita na parroquia de San Pedro de Trasalba do municipio de Amoeiro, con todo o seu mobiliario e enseres, pertenzas, folganzas, alpendres, viñedo, horta, souto de castaños, terreo cereal e demais anexos'».
A concesión do recoñecemento da fundación ourensá coincidirá cunha etapa de celebración na editorial viguesa, toda vez que no 2025 se conmemorará o 75 aniversario da súa creación.
Ademais da actividade cotiá de Galaxia, dende a Fundación Otero Pedrayo tamén se salientou o tratamento que se lle ten dado ao legado do patriarca das letras galegas nestes anos. O esforzo e a entrega que Galaxia «ten feito ao longo destes anos por difundir, publicar e dar a coñecer a obra e a persoa do insigne ourensán».
Último domingo de xuño
O Premio Trasalba entrégase nun acto que se celebra na Casa Grande de Cima de Vila —a sede da fundación— o último domingo de xuño. Logo de materializarse a concesión do galardón —no auditorio da casa— desenvólvese a festa de confraternización que mantén o espírito co que foi creado o recoñecemento. O xantar celébrase á sombra dos castiñeiros do souto que no seu día pertenceu á familia de Otero.