O esprint de Adrián Ben para ser pregoeiro do San Roque en Viveiro: «Levarlles outro ouro é o maior orgullo»
DEPORTES
Inmerso na preparación do Mundial de Tokio tras gañar o nacional en 1.500, fará unha viaxe exprés este mesmo xoves para acompañar aos seus veciños no comezo das festas
14 ago 2025 . Actualizado a las 05:00 h.«Chegarei na mañá do xoves, verei á familia e os amigos e polas nove e media estarei na casa ceando e deitado para adestrar o venres pola mañá e marchar». Así relata Adrián Ben Montenegro (Viveiro, 1998) a viaxe exprés que fará en plena preparación do Mundial de Tokio para compartir cos seus amigos, familiares e veciños a benvida ás festas de San Roque. O atleta dúas veces olímpico e flamante campión de España de 1.500 será o encargado de ler o pregón este xoves ás 19.30 horas na Praza Maior.
«É algo moi especial. Hai case tres anos que me fixeron Fillo Predilecto e sempre direi que estou moi orgulloso de ser de Viveiro. Tratarei de dar un bo pregón, explicar de onde vén iso de reivindicar Viveiro e o que significan estas festas para min, aínda que non sempre puidera gozalas porque as tempadas son como son... Aínda o ano pasado vin, aínda que despois tiña os Xogos Olímpicos de París», destacaba o pasado luns desde unha concentración en altura en Navacerrada, apenas oito días despois de engadir ao seu currículo o título de campión de España de 1.500 ao aire libre en Tarragona.
«Levar outra medalla de ouro para o Viveiro é o maior orgullo», subliña Ben, que confesa este último título como un dos máis especiais dunha traxectoria que ata o de agora lle dera éxitos principalmente nos 800 metros. «Os 1.500 son máis especiais porque é a proba raíña. Era o primeiro ano no que me centraba nela e está indo moi ben. Gañei o campionato de España xusto antes de cumprir os 27 anos, fixen marca persoal e mínimas para o Mundial en 800 e 1.500, e presentarme no pregón con esta medalla de ouro para compartila con todo Viveiro é unha gran alegría», destaca.
No Mundial do vindeiro mes de setembro tampouco descarta dar outra alegría aos seus: «Son o 41 do ránking mundial e das series pasan 24. Non renuncio a nada, pero sei que hai moitísimo nivel, que me queda moito que mellorar... O obxectivo é ir paso a paso. Aspiro ao máximo, pero estarei contento se corro ben, se teño unha boa experiencia».
Polo de pronto, a Adrián Ben tócalle compartir con Viveiro un pregón que agarda con ilusión: «Levo moito tempo en contacto con Gerardo Veiga, que está na comisión e é un dos meus mellores amigos desde nenos, aviseinos de que, por como son as tempadas, non ía poder confirmarlles ata ben entrados no mes de xuño. Díxenlles que entendía que non quixesen esperar, que non había problema se buscaban a outro para non quedarse colgados, pero quixeron contar comigo. Estou agradecido e ilusionado».